Rritje rekord e infeksioneve me Covid në Francë – Mbi 100 mijë raste në 24 orët e fundit!
Franca klasifikohet nga Gjermania si një zonë me rrezikshmëri të lartë. Numri i infeksioneve të reja me Covid të regjistruara brenda një dite ka kaluar shifrën prej 100 mijë raste për herë të parë.
Saktësisht 104.611 raste të reja të infeksioneve të reja me Covid janë regjistruar në Francë brenda vetëm 24 orësh në fundjavë – që është shifra më e lartë që nga fillimi i pandemisë, njoftuan autoritetet franceze për të tretën ditë radhazi.
Me 4 dhjetor në Francë janë raportuar më shumë se 50.000 infeksione të reja për herë të parë dhe brenda tre javësh ky numër është dyfishuar.
Incidenca shtatë ditore mbarëkombëtare tani është rreth 700 dhe Franca tashmë po përjeton valën e pestë të Covid, prej variantit më ngjitës Omikron, sikurse edhe në shumë vende të tjera europiane. Presidenti Emmanuel Macron caktoi një video-konferencë të këshillit kombëtar të krizës pandemike për ditën e hënë dhe më pas kabineti i tij do të mbajë një mbledhje të jashtëzakonshme.
Për shkak të rritjes së fundit drastike të numrit të të infektuarve me virusin Covid, qeveria në Paris do të shtrëngojë shpejt rregullat e aksesit për restorantet dhe manifestimet kulturore. Aktualisht në vend është ende në fuqi “3G”, që do të thotë se në restorante e manifestime kulturore mund të shkojnë të gjithë ata që janë të vaksinuar, shëruar në gjashtë muajt e fundit apo testuar. Ndërsa provat për këto dëshmi shënohen në certifikata shëndetësie.
Në të ardhmen, vetëm një test negativ i Covid nuk do të mjaftojë më për të marrë pjesë në jetën publike në Francë pasi vetëm personat që janë vaksinuar plotësisht ose personat e shëruar – pra grupi i ashtuquajtur “2G” – do të kenë akses në shumë vende. DW
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.