Rrjeti i linjave të transportit/Udhëzimi i Gjiknurit: Kontrolle të vazhdueshme

Monitorimet për zbatimin dhe funksionimin e rrjetit të linjave ndërqytetëse duhet të jenë të vazhdueshme nga ana e institucioneve që e kanë këtë kompetencë”.

Ministri i Infrastrukturës dhe Energjisë, Damian Gjiknuri ka ndryshuar praktikat e deritanishme, ku referuar udhëzimit në fuqi parashikohej që ky monitorim të kryhej  për një periudhë nga 3-9 muaj pas miratimit të këtij rrjeti që u bë në fund të vitit 2016.

Udhëzimi i ri, që mban datën 5 dhjetor vjen në një kohë kur Shoqata e Transportit Kombëtar Interurban ka ngritur shqetësimin se ka lulëzuar transporti i paligjshëm i udhëtarëve, i favorizuar nga mungesa e kontrolleve rigoroze.

Paralelisht me këtë ndryshim, udhëzimi i ri parashikon dhe shfuqizimin e rrjetit të ri të linjave që u bë gjatë muajit korrik të këtij viti, që gjithashtu është kundërshtuar nga shoqata me argumentin se sillte dublikim linjash.

Sipas udhëzimit të ri lihet në fuqi rrjeti i linjave i miratuar në vitin 2016, përveç atyre linjave ndërqytetëse dhe oraret përkatëse, që janë miratuar në zbatim të vendimeve të formës së prerë të gjykatave.

Ndërkaq, subjektet e transportit, të cilat janë pajisur me licenca dhe me certifikata për linjat e parashikuara sipas udhëzimit të korrikut duhet t’i dorëzojnë ato pranë organit që i ka lëshuar, brenda 15 ditësh.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.