Rrogat mbi 2 Mln lekë, shtyhet afati – Deklarimi i të ardhurave për pagat e larta dhe të dypunësuarit, deri më 30 qershor

Përmes një Akti Normativ, Këshilli I Ministrave ka shtyrë me dy muaj afatin e dorëzimit të deklaratës së të ardhurave personale për personat që fitojnë më shumë se dy milionë lekë në vit, si dhe ata që përfitojnë dy paga. Ndërsa afati ligjor ishte 30 prilli, Qeveria ka vendosur të shtyjë deri në fund të qershorit hapësirën për dorëzimin e deklaratave pranë administratës tatimore.

Detyrimin për dorëzimin e Deklaratës Individuale Vjetore të të Ardhurave e njohur si (DIVA) e kanë të gjithë personat të cilët gjatë vitit 2020 kanë realizuar të ardhura, nga të gjitha burimet, brenda dhe jashtë vendit, në shumën 2,000,000 (dy milionë) lekë e më tepër.

Paralelisht, Detyrimin për dorëzimin e Deklaratës Individuale Vjetore e të Ardhurave (DIVA) e kanë gjithashtu edhe individët jo rezidentë, të cilët realizojnë të ardhura të tatueshme, me burim në Republikën e Shqipërisë, në shumën 2,000,000 (dy milionë) lekë e më tepër.

Gjithashtu, duhet të deklarojnë DIVA 2020, pavarësisht se totali i të ardhurave të tyre gjatë këtij viti kalendarik është nën 2.000.000 (dy milionë) lekë, edhe individët rezidentë apo jorezidentë, të cilët kanë qenë të punësuar në më shumë se 1(një) punëdhënës.

Të ardhurat e tatueshme, të detyrueshme për t’u deklaruar nga individët, subjekt deklarimi, janë:

Të ardhura bruto nga paga apo shpërblimet nga marrëdhëniet e punësimit janë të ardhurat bruto nga dividenti; nga qiraja; nga shitja e pasurive të paluajtshme; nga interesat bankare; nga investimet në tituj apo nga pasuri të paluajtshme; nga lojërat e fatit, të drejtat e autorit apo dhurimet.

Deklarata DIVA 2020, gjenerohet e para plotësuar automatikisht me të dhënat e të ardhurave vjetore bruto nga pagat apo shpërblimet nga marrëdhëniet e punësimit për individët, si edhe me përllogaritjen e Tatimit mbi të ardhurat nga Punësimi.

Administrata tatimore u ka kujtuar të gjithë personave të përfshirë në këtë kategori se deklarimi i të ardhurave, përveç se është detyrim ligjor, i çdo individi subjekt i deklarimit, është edhe një garanci më shumë, lidhur me justifikimin e pasurisë së tij.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.