Rruga drejt BE-së/ Ministri i jashtëm holandez: “Shqipëria të luftojë krimin e organizuar dhe korrupsionin”
Shqipëria së bashku me Maqedoninë e Veriut ndodhen në rrugëtimin e tyre drejt anëtarësimit në Bashkimin Europian. Të dyja vendet morën një përgjigje negative në tetor të 2019, mes shumë krerëve të vendeve europiane, të cilët u shprehën se vetoja e vendosur nga Franca ishte “një gabim historik”, që do dëmtonte rajonin.
Një prej vendeve që ka pasur goxha kritika kundrejt Shqipërisë ka qenë edhe Holanda, e cila përgjatë këtyre muajve është shprehur vazhdimisht se vendi ynë ka ende hapa të rëndësishëm për të hedhur nëse kërkon anëtarësimin.
Rreth kësaj çështje ka folur sërish ministri i Jashtëm i Holandës, Stef Blok në një intervistë për median kroate “Jutarnji”. Zyrtari i lartë shprehet se nga Shqipëria kërkohet angazhim i qëndrueshëm në luftën kundër korrupsionit dhe krimit të organizuar. Ai shton se të dy qeveritë kanë njoftuar se synojnë të vazhdojnë me këto reforma, ndërsa shpeh gatishmërinë e Holandës për t’i ndihmuar në rrugën drejt anëtarësimit në BE.
“Të gjitha vendet e Ballkanit Perëndimor kanë një perspektivë të vërtetë për t’u anëtarësuar në BE dhe mbështetja e Hollandës për këtë qëllim përfundimtar është i palëkundur. Ne mirëpresim progresin e bërë në të dy vendet. Maqedonia Veriore ka bërë shumë përparim në drejtim të reformave të sundimit të ligjit. Dhe marrëveshja e Prespës midis Greqisë dhe Maqedonisë së Veriut shërben një shembull për rajonin. Ne gjithashtu kemi mirëpritur hapat pozitivë të ndërmarrë nga Shqipëria. Verifikimi i gjyqtarëve dhe prokurorëve është veçanërisht thelbësor. Ka pasur reforma të rëndësishme ligjore dhe janë krijuar institucione të reja të drejtësisë. Sidoqoftë, përpara fillimit të negociatave të pranimit, Shqipëria do të duhet të tregojë një angazhim të qëndrueshëm për të luftuar korrupsionin dhe krimin e organizuar. Këshilli Evropian do të kthehet në këtë çështje para Samitit të Ballkanit Perëndimor në maj të vitit 2020. Si më parë, ne do të mbështesim Maqedoninë e Veriut dhe Shqipërinë në përpjekjet e tyre për të ecur drejt një të ardhmeje në BE. Periudha e ardhshme mund të përdoret për reforma të mëtejshme të sundimit të ligjit. Të dy qeveritë kanë njoftuar se synojnë të vazhdojnë me këto reforma. Ne jemi të gatshëm t’i ndihmojmë të dy vendet në proceset e tyre të vazhdueshme të reformës”, thotë Blok ndër të tjera.
Në Samitin e Ballkanit Perëndimor që do të mbahet në Kroaci në maj të 2020-ës, do të vendoset e ardhmja e Shqipërisë dhe Maqedonisë së Veriut në raport me anëtarësimin në BE.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.