Rruga drejt çlirimit të potencialit ekonomik të Koresë së Veriut – Nga pasuria nëntokësore tek ndërlidhja e rrjetit rrugor
Samiti i përbashkët mes dy liderëve Donald Trump dhe Kim Jong Un ka ngritur pyetje mbi çfarë do të ndodhte nëse Korea e Veriut, një prej shteteve më të varfra të botës, do të zhytej menjëherë në një prej rajoneve ekonomike më dinamike në glob.
Ndryshimet politike në gadishullin korean do të ndiheshin menjëherë pasi nuk ka qenë kurrë më parë kaq pranë fundi zyrtar i Luftës Koreane dhe një marrëveshje mbi denuklearizimin e Koresë së Veriut.
Nëse do të realizohet progres i vërtetë, Presidenti i Koresë së Jugut, Moon Jae-in ka një plan që përfshin tre breza ekonomikë që do të lidhin zemrën industriale të shtetit të tij me Veriun e më pas me Kinën e Rusinë.
Një nga hapat e parë do të ishte rihapja e lidhjeve rrugore dhe hekurudhore mes dy Koreve. Përmirësimi i infrastrukturës do të ndihmonte gjithashtu Korenë e Veriut në monetizimin e resurseve të saj minerare, rezervat e të cilës llogariten në 6 trilion dollarë.
Veriu mund të përmbajë depozitën më të madhe të elementëve të rrallë të tokës, si skandiumi, dhe itriumi, elementë që janë kyçe për motorët elektrikë të makinave dhe shumë pajisje të larta teknologjike që prodhohen në Korenë e Jugut.
Korea e Veriut mund të përdorë mineralet e saj edhe si kolateral për të përfituar fonde për të zhvilluar ekonominë, për të ndërtuar rrugë të reja dhe për të përmirësuar infrastrukturën energjetike.
Megjithatë, nëse këto projekte do të mund të konkretizohen më tej apo do të rikthehen në hije, varet vetëm nga negociatat në vazhdim mes palëve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.