Rruga e Arbrit – 3.6 milionë euro tender për shërbime konsulence
Ministria e Infrastrukturës dhe Energjisë ka vënë në dispozicion rreth 3.6 milion euro për kompani që do të ofrojnë “Shërbime inxhinierike të pavarura për zbatimin e kontratës koncesionare/ppp për përmirësimin, ndërtimin, operimin dhe mirëmbajtjen e rrugës së Arbri.
Tenderi për shërbim konsulence është publikuar në Agjencinë e Prokurimit Publik dhe afati për dorëzimin e kërkesës dhe shprehjen e interesit është data 31 gusht 2018, ndërsa kohëzgjatja e kontratës do të jetë 42 muaj plus 12 muaj garanci.
Në muajin Mars të këtij viti, Qeveria ka miratuar kontratën për ndërtimin e rrugës së Arbrit, duke i hapur rrugën përfundimit të një prej veprave më të rëndësishme infrastrukturore në vend.
Miratimi erdhi pas firmosjes në muajin shkurt mes Ministrisë së Infrastrukturës dhe Energjisë dhe kompanisë Gjoka, e cila është firma fituese që do të zbatojë projektin.
Në total vepra do të kushtojë 240 milion euro, ndërkohë që shteti ka marrë përsipër likuidimin e kontraktorit brenda një periudhe 13-vjeçare. Sipas projektit nga Tiranë në Bulqizë ajo do të ketë një gjatësi prej 50 km dhe nga Tirana në Bllatë 74 km.
Punimet për ndërtimin e Rrugës së Arbrit kanë nisur në mesin e muajit Qershor.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.