Rruga e Kombit – Turqit konsulentë të koncesionit, kush është kompania
Kompania DOLSAR Engineering, me zyra qendrore në Turqi është fituesja e garës së hapur nga Ministria e Transporteve dhe Infrastrukturës në Mars të këtij viti për konsulencën që do të jepet për koncesionin e Rrugës së Kombit.
Edhe pse në total pjesë e tenderit janë bërë një numër i madh kompanish, një pjesë të njohura edhe më parë për shërbime ndaj qeverisë shqiptare, vetëm dy kanë arritur të kualifikohen. Përveç Dolsar është klasifikuar si e dyta në listë TNM Limited.
Por kush është kompania që do të lidhë kontratën me Transportet?
Ajo njihet për aktivitet të zgjeruar konsulence, inxhinieri arkitekturore dhe mbikëqyrje punimesh në sektorin e ujit, energjisë, transportit mjedisit dhe ndërtimit. Aktiviteti i saj shtrihet në vende si Azerbajxhani, Bosnja, Qipro, India, Iraku, Libia, Arabia Saudite dhe Turkmenistani.
Konsulenca që do të ofrojë për qeverinë shqiptare do të ketë një afat 60 mujor. Pagesa që do të marrë për këtë shërbim është 484 milionë lekë nga 485 që ishte fondi limit.
Paratë do të paguhen në 50 për qind nga buxheti i shtetit dhe 50 për qind nga koncesionari, në këtë rast konsorciumi ku bëjnë pjesë kompanitë Salillari dhe Kastrati.
Struktura monitoruese do të shohë nga afër çdo detaj madje do të fokusohet edhe tek mënyra sesi do të bëhet pagesa në rrugë, rastet e mashtrimeve, një aspekt ky shumë i ndjeshëm në bilancin total në koncesionit.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.