Rruga e re për trafikimin e shqiptarëve në Britani – Interpol shpërbën rrjetin. Ja skema
Një operacion ndërkombëtar policor ka shpërbërë një rrjet për trafikimin e shqiptarëve në Mbretërinë e Bashkuar. Operacioni zbuloi mbi 50 njerëz të përfshirë që bënin miliona duke futur fshehurazi emigrantët përmes 17 shteteve për të arritur në Britani, SHBA dhe Kanada.
39 të dyshuar janë tashmë nën akuzë për trafikim, ndërsa 12 të tjera janë në arrati. 4 nga të dyshuarit janë policë kufitarë në Shqipëri, të cilët dyshohet se kanë ndihmuar bandat.
Shqiptarët paguanin 7 mijë deri në 10 mijë paund për të arritur në Britani, si edhe 10 mijë deri në 20 mijë paund shtesë për të mbërritur në Shtetet e Bashkuara ose Kanada.
Rreth 50% e këtyre emigrantëve, ose 750 shqiptarë, kanë përfunduar në Mbretërinë e Bashkuar. Shumica përdornin pasaporta dhe karta identiteti të rreme për të hipur në bordin e trageteve. Shumica e dokumenteve të falsifikuara ishin italiane, ndërsa të tjera franceze dhe spanjolle.
Fillimisht rruga për në Britani kalonte përmes Italisë dhe Francës, por pas aksioneve të policisë në këto shtete rruga u bë më e komplikuar. Kjo rrugë tashmë kalonte nga Mali i Zi, Serbia, Gjermania dhe Spanja e veriut, nga ku më pas do të hipnin në anije për të mbërritur jugun e Anglisë.
Operacioni nisi pas zbulimeve të Daily Mail për shkallën dramatike të kalimeve ilegale të shqiptarëve drejt Britanisë, ku shumë emigrantë të rinj bënin selfie në mënyrë të hapur gjatë rrugës, duke qeshur dhe bërë shaka për faktin se po fshiheshin në kamionë drejtuar Britanisë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.