Rrugëtimi drejt BE, Rama – Ambasadorëve: Mbështesni Shqipërinë drejt integrimit
“Destinacioni europian ka bërë që pozita dhe opozita të bashkëpunojnë për çështjet madhore”.
Në një moment kur Shqipëria është më afër se kurrë hapjes së negociatave për anëtarësimin në Bashkimin Europian, Rama u ka bërë thirrje ambasadorëve të akredituar në vendin tonë, që jenë “avokatë” të Shqipërisë, pasi gjashtë muajt e ardhshëm do të jenë vendimtarë për negociatat për anëtarësim në union.
“Dua t’ju përsëris edhe publikisht thirrjen të gjithëve ju që e njihni Shqipërinë nga brenda, që i njihni shqiptarët nga afër që çdo fjalë e duhur në drejtimin e duhur për ta mbështetur këtë proces dhe për ta mundësuar çeljen e negociatave në 6 mujorin e parë të vitit të ardhshëm nuk është diçka që e meritoj unë, qeveria, opozita dhe prandaj duhet ta bëni, por është diçka që e meritojnë shqiptarët”.
Sipas Ramës zbatimi i reformës në drejtësi është i vështirë por jo i pamundur. Për këtë arsye, kryeministri shprehet i gatshëm që të ketë një tjetër marrëveshje bashkëpunimi mes qeverisë dhe opozitës, pas marrëveshjes së majit.
Këto deklarata Rama i bëri në takimin e fundvitit me ambasadorët e akredituar në Shqipëri.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.