Rubla, në nivelin më të lartë ndaj Dollarit – Fuqizimi ndikohet nga kompanitë e fokusuara në eksport!

Monedha kombëtare e Rusisë, rubla fitoi më shumë se 7% kundrejt dollarit të premten, duke arritur nivelet e regjistruara në mars 2018, e nxitur nga kontrollet e kapitalit dhe pagesat e taksave të brendshme që zakonisht çojnë në rritjen e kërkesës për monedhën. Rubla është forcuar me gati 30% deri më tani këtë vit, pavarësisht një krize ekonomike, duke u bërë monedha me performancën më të mirë, e mbështetur artificialisht nga kontrollet e vendosura në fund të shkurtit për të mbrojtur sektorin financiar të Rusisë pas agresionit të armatosur ndaj Ukrainës.

Në orët e mesditës, rubla u tregtua në nivelin 58,90 kundrejt dollarit në bursën e Moskës, pasi u regjistrua në 57,07 për herë të fundit në mars 2018. Kundrejt euros, rubla u forcua me më shumë se 5% në 60.86, niveli më i lartë që nga qershori 2015.

Rubla ndikohet nga kompanitë e fokusuara në eksport, të cilat janë të detyruara të konvertojnë të ardhurat e tyre në valutë pasi sanksionet perëndimore ngrinë gati gjysmën e rezervave të arit dhe valutës ruse. Ndërkohë, kërkesa për dollarë dhe euro mbetet e ulët për shkak të zinxhirëve të ndërprerë të importeve dhe kufizimeve në tërheqjen e valutës së huaj nga llogaritë bankare dhe lëvizjen e saj jashtë Rusisë.

Analistët ngrenë pyetjen kryesore, nëse banka qendrore do të ndërhyjë pasi forcimi i tepërt i rublës nuk është në planet e ministrisë së financave dhe buxhetit. Rubla më e fortë ndihmon në frenimin e inflacionit dhe është e dobishme për importuesit, por dëmton eksportuesit që shesin mallra dhe shërbime jashtë vendit për valutë të huaj, që do të thotë të ardhura të reduktuara për buxhetin e Rusisë që varet nga eksporti.

Analistët thonë se autoritetet ruse nuk janë të interesuara për një forcim të konsiderueshëm të rublës nga nivelet aktuale dhe presin që monedha të dobësohet deri në fund të vitit. Autoritetet janë gati të heqin gradualisht kontrollet e kapitalit, ndërsa banka qendrore lejoi bankat tregtare t’u shesin qytetarëve valutë të huaj pa asnjë kufizim nga 20 maji, me përjashtim të dollarëve amerikanë dhe eurove.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.