Rubla ruse qëndron pranë niveleve më të larta të 5 viteve kundrejt euros!

Rubla ruse kaloi 64 për dollar të hënën dhe u ngjit drejt nivelit më të lartë të pesë viteve ndaj euros, mbështetur nga kufizimet e vazhdueshme në tregtimin e monedhës.

Rubla është monedha me performancën më të mirë në botë këtë vit, megjithëse kjo është për shkak të mbështetjes artificiale nga kontrollet e kapitalit që Rusia vendosi për të mbrojtur sektorin e saj financiar në fund të shkurtit, pasi dërgoi dhjetëra mijëra trupa në Ukrainë.

Në orën 07:44 GMT, rubla ishte 0.9% më e fortë kundrejt dollarit në 63.96, duke qëndruar pranë pikës së saj më të fortë që nga fillimi i shkurtit 2020 prej 62.6250, që arriti të premten.

Kundrejt euros, rubla u rrit me 1% në 66.39, duke qëndruar pranë nivelit më të fortë që nga qershori 2017 prej 64.9425, të cilin e preku në bursën e Moskës të premten.

Tensionet gjeopolitike midis Moskës dhe Perëndimit dhe frika nga një paketë e re sanksionesh për të ndëshkuar Rusinë për atë që ajo e quan “një operacion special ushtarak” në Ukrainë janë në fokus. Por ndikimi i tyre zbutet nga konvertimi i detyrueshëm i valutës së huaj nga kompanitë e fokusuara në eksport dhe nga kufizime të tjera.

“Përforcimi i rublës sot mund të jetë i moderuar, por kursi i dollarit mund të bjerë gradualisht në 62,” thanë analistët e Promsvyazbank në një shënim.

Indekset ruse të aksioneve u rritën. Indeksi RTS i shprehur në dollarë u rrit me 1.7% në 1150.9 pikë. Indeksi rus i bazuar në rubla u rrit 1.6% në 2343.9 pikë.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.