Rusia ndërpret gazin për Finlandën – Vendimi, pas refuzimit të Helsinkit për të paguar në rubla

Gjigandi i gazit rus Gazprom ka ndërprerë eksportimin e gazit për Finlandën në kuadër të përshkallëzimit të tensioneve për sa i përket refuzimit të vendeve perëndimore për të paguar gazin rus në rubla.

Gazprom i ka kërkuar vendeve europiane që të paguajnë në valutën ruse për shkak të sanksioneve që janë vendosur ndaj Moskës si pasojë e pushtimit të Ukrainës. Por Finlanda refuzoi ta bëjë një gjë të tillë. Vendimi i Gazprom vjen në një moment që Finlanda ka aplikuar për anëtarësimin në NATO, një vendim i marrë pas shpërthimit të luftës në Ukrainë. Operatori i sistemit të furnizimit me gaz në Finlandë konfirmoi se importi i gazit nëpërmjet pikës së Imatra është ndërprerë.

Kjo është dhe pika hyrëse për gazin rus në Finlandë. Kompania shtetërore finlandeze Gasum kishte paralajmëruar më parë për ndërprerjen e furnizimit pikërisht të shtunën e 21 majit. Dhe Gasum dhe Gazprom konfirmuan ndërprerjen e furnizimit, me kompaninë finlandeze që shtoi se do të furnizojë klientët me gaz natyror që do të merret nga burime të tjera nëpërmjet gazsjellësit Baltik Konektor. Ky i fundit e lidh Finlandën me Estoninë.

Pjesa më e madhe e gazit të përdorur në Finlandë vjen nga Rusia por gazi përbën vetëm 5% të energjisë që shpenzohet në vend në një vit. Pjesa më e madhe e kontratave me Moskën janë në euro dhe në dollarë, ndërkohë që Rusia ka ndërprerë furnizimin me gaz dhe për Bullgarinë dhe Poloninë një muaj më parë, pikërisht për shkak të mënyrës së pagesës.

Qeveria finlandeze u shpreh se çdo gjë është përgatitur për t’u përballur me ndërprerjen e gazit rus dhe se vendi do ia dalë të menaxhojë kërkesën dhe pa ‘të.

Kompania shtetërore finlandeze e furnizimit me gaz u shpreh se sistemi është në ekuilibër të plotë si nga ana infrastrukturore ashtu dhe nga ajo financiare. Finlanda pranoi se kishte arritur një marrëveshje për të krijuar rezerva gazi nga kompania Excelerate Energy me bazë në Shtetet e Bashkuara të Amerikës për të kompensuar humbjen e gazit rus.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.