Rusia paralajmëron Perëndimin: ‘Faturat e pagesës së gazit në rubla janë vetëm disa ditë larg’!
Rusia paralajmëroi Perëndimin se faturimi në rubla për miliarda dollarë të eksporteve të gazit natyror në Europë mund të jetë vetëm disa ditë larg, përgjigja më e ashpër e Moskës ende ndaj sanksioneve shkatërruese të vendosura nga Perëndimi për pushtimin e Ukrainës. Me ekonominë ruse që po përballet me krizën e saj më të rëndë që nga vitet që pasuan shpërbërjen e Bashkimit Sovjetik, Presidenti Vladimir Putin të mërkurën iu kundërpërgjigj Perëndimit, duke urdhëruar që eksportet e gazit rus të paguhen në rubla.
Putin tha se Perëndimi kishte shpallur luftë ekonomike duke ngrirë asetet ruse dhe kështu Rusia nuk shihte më asnjë kuptim të merrte dollarë apo euro për eksportet ruse. Kremlini deklaroi se Putini kishte urdhëruar Gazprom, kompaninë më të madhe në botë të gazit natyror, e cila furnizon 40% të gazit europian, të pranonte pagesat e eksportit në rubla dhe se i kishin mbetur vetëm katër ditë për të përcaktuar se si.
“Ka një udhëzim për Gazprom nga presidenti i Federatës Ruse që të pranojë pagesat në rubla,” u tha gazetarëve zëdhënësi i Kremlinit, Dmitry Peskov. “Ky informacion do t’u bëhet i njohur blerësve të produkteve të Gazprom”.
Blerësit e gazit kanë kërkuar udhëzime se si mund të marrin rubla për të bërë ndonjë pagesë të tillë, duke pasur parasysh shtrirjen e sanksioneve ndaj Rusisë. Nëse Gazprom insistonte në pagesat me rubla dhe ndalonte dërgesat nëse pagesat nuk bëheshin në rubla, atëherë ekspertët mendojnë se kjo do të ishte një shkelje e kushteve të kontratës.
Pagesat në rubla do të mbështesin monedhën ruse, e cila ka rënë që nga pushtimi më 24 shkurt. Fjalimi i Putinit të mërkurën ngriti vlerën e rublën me 9% kundrejt dollarit. Ndërkohë çmimet holandeze të gazit, pikë referimi europiane, janë rritur për shkak të shqetësimeve nëse vendet do të jenë të gatshme apo edhe në gjendje të paguajnë në rubla.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.