Rusia rrit fondin e saj të shpenzimeve emergjente me 3.5 miliardë dollarë!

Qeveria ruse tha të dielën se ka rritur fondin e saj rezervë të përdorur për shpenzimet emergjente me 273.4 miliardë rubla (3.52 miliardë dollarë) për të siguruar stabilitetin ekonomik në sfondin e sanksioneve perëndimore mbi Ukrainën.

Sanksionet, të vendosura pasi Rusia pushtoi Ukrainën më 24 shkurt në atë që Moska e përshkruan si një “operacion special ushtarak”, e ndërprenë Rusinë nga sistemi financiar global dhe kanalet e furnizimit. Vendet perëndimore po i afrohen gjithashtu një ndalimi të plotë të energjisë nga Moska për t’i hequr Kremlinit burimin më të madh të të ardhurave.

Qeveria ka premtuar tashmë më shumë se 1 trilion rubla në mbështetje kundër krizës për bizneset, pagesat sociale dhe familjet me fëmijë, të cilat do të marrin të gjitha të ardhurat e këtij viti, kështu që nuk do të ketë suficit buxhetor.

“Fondet, ndër të tjera, do të përdoren për zbatimin e masave që synojnë sigurimin e stabilitetit ekonomik në dritën e sanksioneve të jashtme,” tha qeveria në një deklaratë të dielën. Fondi rezervë i qeverisë është një jastëk parash për t’u përdorur për shpenzime të papritura që nuk ishin parashikuar në buxhetin e shtetit. Vitin e kaluar, ai u përdor për pagesa sociale një herë dhe për të luftuar pandeminë.

Qeveria tha se burimi kryesor i rritjes së fondit rezervë ishte 271.6 miliardë rubla në të ardhurat shtesë të energjisë të marra në tremujorin e parë, pasi çmimet e naftës dhe gazit u rritën si përgjigje ndaj rimëkëmbjes nga ndikimi i COVID-19 dhe konflikti Rusi-Ukrainë ngriti rrezikun e ndërprerjes së furnizimit.

Rusia furnizon rreth 40% të konsumit të gazit natyror të Bashkimit Europian, të cilin Agjencia Ndërkombëtare e Energjisë e vlerëson në më shumë se 400 milionë dollarë në ditë. BE-ja merr një të tretën e importeve të saj të naftës nga Rusia, rreth 700 milionë dollarë në ditë. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.