Ryanair shton flotën – Synon zgjerimin në Europë me avionë të rinj Boeing
Ryanair, gjiganti low-cost, planifikon të përshpejtojë zgjerimin në Europë duke fituar avantazh ndaj konkurrentëve rajonalë dhe reduktuar varësinë ndaj tregut të pasigurt në Britani.
Ryanair është në bisedime me Boeing, për të shtuar 3 modele 737 të kompanisë amerikane në një porosi të bërë më parë, si dhe për të zgjatur qiranë e 10 avionëve të tjerë deri në vitin 2019, deklaron kompania irlandeze.
Kjo lëvizje do të nxisë rritjen e kompanisë në Itali, Gjermani, Poloni dhe Rumani, ku linja ajrore si Air Berlin dhe Alitalia po ristrukturojnë operacionet prej humbjeve të mëdha.
Kreu i Financiave i Ryanair thotë se Europa ofron shumë mundësi dhe se një nga faktorët që limiton rritjen në këtë rajon është dërgesa e avionëve të rinj. Ryanair ka ulur kostot dhe çmimet për të mposhtur rivalët në linjat rajonale, ndërkohë që ka zgjeruar rrjetin partner transatlantik.
Anulimet e mëdha te British Airways gjatë fundjavës që kaloi, kanë sjellë gjithashtu përfitime për Ryanair. Transportuesi ajror me seli në Dublin, do të shtojë 47 avionë të rinj deri në Mars të 2018-ës, përjashtuar avionët shtesë që mund të marrë nga Boeing. Kjo e bën kompaninë me një zotërim prej 427 avionë.
Rritja e kërkesës në vitin që kaloi, bëri që të ardhurat neto të Ryanair për vitin fiskal që përfundoi më 31 Mars, të arrinin në 1.32 miliardë euro. Numri i pasagjerëve u rrit me 13% në 120 milionë.
Mungesa e detajeve të Brexit mund të sjellë ndërprerje të mëdha të fluturimeve. “Për rrjedhojë, ne do të vazhdojmë të zgjerohemi larg Mbretërisë së Bashkuar në dy vitet e ardhshme, duke ndjekur mundësitë që ofron Europa”, deklaron Ryanair.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.