Sa barna eksporton Shqipëria? – Gjatë janarit vetëm 220 mijë euro, importet bien me 187%
Ndër masat e marra nga qeveria shqiptare për të përmbajtur përhapjen e covid-19 në vendin tonë është edhe ndalimi i eksportit të barnave deri në një vendim të dytë. Por sa barna eksporton realisht Shqipëria dhe a ka peshë realisht ky zë në ekonominë e vendit apo industrinë farmaceutike? Të dhënat e institutit të statistikave për tregtinë e jashtme gjatë janarit flasin për vetëm 27 milionë lekë eksporte në zërin produkte farmaceutike.
Kjo shifër përkthehet në rreth 220 mijë euro në muaj, të paktën referuar të dhënave të janarit të këtij viti. Duke qenë se flasim për një zë me një vlerë nominale relativisht të ulët në raport me industrinë në tërësi, shifra është e luhatshme, pasi në raste të caktuara, si në prillin e vitit të kaluar, eksportet mujore fiksoheshin në 74 milionë lekë, pra rreth 600 mijë euro. Vendimi i qeverisë shqiptare për të ndaluar kështu eksportet e barnave duket se nuk do të ketë një impakt të ndjeshëm në industrinë farmaceutike të vendit. Krahasuar me importet shifra është dhjetra herë më e ulët.
Ky zë, pra importi i produkteve farmaceutike gjatë muajit janar të këtij viti ka pësuar një rënie drastike, si në terma mujorë, ashtu edhe në terma vjetorë. Më saktësisht, gjatë janarit të këtij viti importet e produkteve farmaceutike ishin 187% më të ulta se muaji paraardhës dhe 72% më të ulta se muaji janar i vitit 2019. Shifra e importit të produkteve farmaceutike gjatë janarit të këtij viti fiksohet kështu në 871 milionë lekë, ose rreth 7.1 milionë euro, ndërkohë që një muaj më parë ishte 2.5 miliardë lekë, ose rreth 20 milionë euro.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.