Sa energji elektrike paguajmë? – Më pak se një europian mesatar, i vetmi vend ku çmimet s`kanë ndryshuar
Shqipëria është i vetmi vend i Europës ku çmimet e energjisë elektrike nuk kanë pësuar asnjë ndryshim përgjatë vitit të kaluar, krahasuar me 2017-ën, thotë Eurostat në publikimin më të fundit.
Në pjesën dërrmuese të vendeve europiane, pra në 31 shtete ndër 38, çmimi i energjisë elektrike përgjatë 2018-ës është rritur krahasuar me vitin paraardhës. Ndër 38 shtete ndërkohë, vendi ynë është i 26-ti sa i përket çmimeve të njësuara sipas standardit të secilit vend. Pra, janë 12 shtetet europiane ku qytetarët paguajnë më pak se në vendin tonë për energjinë elektrike dhe mes tyre mund të përmendim edhe vende si Suedia, Holanda, Luksemburgu apo Austria.
Krahasuar me rajonin ndërkohë, rezulton se në Maqedoninë e Veriut dhe në Serbi, qytetarët paguajnë më pak se ne për energjinë elektrike. Krahasuar me mesataren europiane, sipas eurostat, qytetarët shqiptarë paguajnë më pak se një europian mesatar për energjinë elektrike, sipas standardit të tyre. Në terma absolutë ndërkohë, pra duke krahasuar çmimin e energjisë, jo të njësuar në fuqi blerëse, me 9.1 euro për KwH, janë vetëm tre shtete më të lira se vendi ynë; Kosova, Serbia dhe Maqedonia e Veriut.
Një tjetër indikator tregon barrën e taksave në çmimin e energjisë elektrike. Në vendin tonë taksat zënë 17% të çmimit. Në Europë, janë vetëm 3 shtete ku kjo normë është më e ulët, me Kosovën që kryeson me vetëm 9%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.