Sa na “kushtojnë” emigrantët? Studimi, humbje deri në 0.9% të PBB çdo vit, ose $1.2 mld që prej 1999
Një raport i publikuar së fundmi tenton të hedhë sadopak dritë mbi impaktin që ka emigrimi në ekonominë e vendeve të ndryshme, përfshirë Shqipërinë, si një prej vendeve më të goditura nga fenomeni.
Vetëm pak ditë më parë, të dhënat e fundit të zyrës europiane të azilantëve tregonin se, shqiptarët në 2017 ishin të vetmit europianë të pranishëm në listën e azilkërkuesve, ata që janë përsëritësit më të mëdhenj të kërkesave, si dhe ata që kanë bërë progresin më të vogël në krahasim me çdo kombësi tjetër të botës në këtë drejtim.
Pra, fenomeni vijon të jetë prezent, dhe dëmet në ekonominë shqiptare janë kolosale. Sipas raportit me titull; “Njerëzit në lëvizje, Migrimi dhe lëvizshmëria në Bashkimin Europian”, Shqipëria është një prej vendeve që përballet me kostot më të larta si pasojë e emigrimit në shkallë të gjerë, së bashku me vende si Rumania, Mali i Zi, Letonia dhe Lituania.
Raporti është publikuar nga Bruegel, një Think Tank me bazë në Bruksel i specializuar në kërkimet për politikat ekonomike dhe një ndër më të mëdhenjtë e më prestigjiozet në botë në këtë drejtim.
Sipas këtij raporti, ekonomia shqiptare ka humbur çdo vit që prej 1999, 0.6% deri në 0.9% të PBB si pasojë e të larguarve. Studimi i referohet viteve 1999-2014, por duke qenë se, fenomeni vijon të jetë ende i pranishëm në shoqërinë tonë, atëherë nuk do të ishte e tepërt të thuhej se këto norma janë aktuale.
Sipas një llogarie të thjeshtë, këto norma përkthehen në një humbje deri në 1.2 miliardë dollarë të ekonomisë shqiptare në harkun e këtyre 16 viteve të marra në analizë.
Pra, ndërkohë që emigrantët janë një ndihmë e madhe për ekonominë vendase, treguesi më i mirë i të cilës janë remitancat, largimi i tyre duket se ka edhe një kosto të matshme për ekonominë shqiptare.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.