Sa paguan çdo shqiptar TVSH dhe akcizë në vit? – Studimi i “Altax”/ Konsumi ”barrë” e rëndë për buxhetet familjare!
Qytetarët shqiptarë janë të detyruar që në çdo blerje të produkteve të ndryshme të paguajnë Tatimin mbi Vlerën e Shtuar dhe po ashtu të paguajnë akcizë 37 lekë për litër për karburant. Por sa është vlera e pagesave që bën në vit për këto dy taksa? Referuar studimit të bërë nga qendra “ALTAX” i publikuar në Ditën e Lirisë Fiskale, bëhet me dije se barra e tatimeve të konsumit (TVSH dhe akcizat) për secilin individ, pavarësisht vendodhjes së tij është e konsiderueshme.
Kështu studimi thekson se në vitin 2021, secili individ rezident fiskal, por dhe jorezidentët (të huajt), ka kontribuar në buxhet, me 100 mijë lekë në vit përkatësisht 78 mijë lekë TVSH dhe 22 mijë lekë akcizë për blerjet e mallrave dhe shërbimeve të ndryshme, përfshirë karburantet dhe ushqimet. Referuar dokumentit, kjo llogaritje është më afër perceptimit korrekt, për arsye se ky tatim paguhet nga secili individ kur blen mallra apo shërbime.
“Kur marrim në konsideratë faktorët ndikues të barrës tatimore edhe për taksën e qarkullimit dhe karbonit, duket se nga matja e taksave që paguajmë për karburantet dhe gazin për mbi 560 mijë automjete (afërsisht 550 mijë familje shqiptare) duket se përveç barrë tatimore vendore paguhen edhe 40 mijë lekë në vit edhe taksa nacionale (taksë qarkullimi dhe karboni)” thuhet ne studim. Edhe pse këto tatime për konsumin dhe taksat nacionale janë pjesë e barrës tatimore qendrore, këto i rëndojnë buxhetit të secilës familje shqiptare, dhe janë pjesë shtesë mbi barrën e tatimeve dhe taksave vendore.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.