Samiti “16+1” – Do të mbahet në datat 6 dhe 7 korrik në Sofje
Samiti i Kinës me vendet e Europës Lindore dhe Qendrore do të mbahet në datat 6 dhe 7 korrik në Sofje sipas qeverisë bullgare. Iniciativa “16+1”, pjesë e së cilës është edhe Shqipëria do të jetë edhe ngjarja e parë e rëndësishme në kryeqytetin bullgar, pas përfundimit me 30 qershor të mandatit të vendit të presidencës së radhës të Këshillit të Bashkimit Europian.
Kjo iniciativë është një nismë e Kinës e cila synon intensifikimin dhe zgjerimin e bashkëpunimit me 11 shtete anëtare të Bashkimit Europian dhe pesë vende të Ballkanit, në fushën e investimeve, transportit, financave, shkencës, arsimit dhe kulturës.
Më herët, në mars të këtij viti Reuters deklaroi se samiti jo vetëm që mund të shtyhet, por po mendohet si mundësi edhe mbajtja e tij jo më çdo vit, por çdo dy vjet.
Vendimi që Sofja do të mbajë takimin e vitit 2018 të Kinës dhe Vendeve të Europës Qendrore dhe Lindore u bë i ditur në samitin e nëntorit të 2017-ës, në kryeqytetin hungarez.
Ndërkohë, pritet që përveç krerëve të shtetit të vendeve pjesëmarrëse, në takimin e shtatë do të marrin pjesë edhe rreth 1000 njerëz nga bota e biznesit, ku gjysma e tyre pritet të jenë nga Kina.
G.D/SCAN
Lamtumirë “16+1”? – Reuters: Kina po mendon ta shtyjë, për shkak të presionit
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.