Samiti i 1-rë i Dixhitalizimit, Mesi: Të angazhuar për t’ju bashkuar marrëveshjes rajonale të Roaming
Shqipëria është plotësisht e angazhuar drejt integrimit dixhital të rajonit brenda tregut dixhital pan-evropian, deklaroi zëvendëskryeministrja e Shqipërisë Senida Mesi, gjatë pjesëmarrjes në Samitit të 1-rë i Dixhitalizimit të Ballkanit Perëndimor, që po mbahet në Shkup.
Mesi shprehu gatishmërinë dhe angazhimin e Shqipërisë për t’iu bashkuar marrëveshjes rajonale të Roaming.
“Integrimi dixhital, detyrim dhe angazhim për qytetarët tanë dhe brezat e ardhshëm. Integrimi dixhital brenda tregut dixhital pan-evropian, mund të jetë një realitet. Si rajon, jemi plotësisht të angazhuar për të zhvilluar më tej axhendën dixhitale nëpërmjet projekteve konkrete dhe iniciativave të përbashkëta. Përshtatja e strategjive të aftësisë dixhitale në linjë me modelin e BE-së, domosdoshmëri për të gjithë rajonin. Konfirmojmë gatishmërinë dhe angazhimin tonë për t’ju bashkuar marrëveshjes rajonale të Roaming. Politikat e koordinuara roaming drejt një rajoni me roaming të lirë, pjesë e angazhimit tonë. Jemi plotësisht të përkushtuar të punojmë së bashku në krijimin e një zonë të lirë roaming, e cila duhet të arrihet nëpërmjet bashkëpunimit”.
Zëvendëskryeministrja tha se Shqipëria ka bërë progres të dukshëm me dixhitalizimin e administratës publike dhe shërbimeve publike – TIK, pjesë e të gjitha fushave në sektorin publik.
Samiti mbledh Krerët e Qeverive nga Ballkani Perëndimor; përfaqësues të rëndësishëm nga bizneset, organizatat rajonale, rinia, akademia dhe shoqëria civile e Ballkanit Perëndimor.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.