Samiti i OKB-së për klimën – Meta: Po zbatojmë direktivat e BE-së për zhvillimin e qendrueshëm
Presidenti, Ilir Meta mori pjesë në Samitin e Kombeve të Bashkuara të Katovicës “COP24”, që po zhvillohet në Poloni, nën moton “Të ndryshojmë së bashku”. Në fjalën e tij Meta u ndal në përpjekjet që është duke bërë Shqipëria për zhvillimin e qëndrueshëm global si rezultat i ndryshimeve klimatike.
“Në një kohë rekord të ratifikimit, palët e përfshira që kanë edhe detyrime në Marrëveshjen e Parisit kanë kaluar nga epoka e shpresës në epokën e zbatimit konkret të saj. Kjo Marrëveshje, së bashku me Axhendën e Zhvillimit të Qëndrueshëm, ofrojnë një rrugë të qartë për të ecur para e për të adresuar ndryshimet klimatike si dhe zhvillimin e qëndrueshëm në shkallë globale. Ne kemi miratuar Kontributin e Përcaktuar Kombëtar me angazhimin për të reduktuar emetimet e dioksidit të karbonit në nivelin 11.5%”, tha Meta.
Më tej presidenti u shpreh Shqipëria si një vend kandidat për në Bashkimin Europian, ka shkrirë politikat për klimën dhe energjitë në një Plan të Integruar Kombëtar, në përputhje gjithashtu edhe me Udhërrëfyesin e Gjashtë për Ballkanin Perëndimor për Tregjet e Qëndrueshme Energjetike Kombëtare dhe Rajonale. Ndërsa referuar burimeve financiare , duke përfshirë këtu edhe zhvillimin e teknologjisë si dhe rritjen e kapaciteteve, Meta ka kërkuar mbështetjen e vendeve më të zhvilluara.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.