Samiti i Triestes – Infrastruktura, gati tjetër traktat mes vendeve të Ballkanit

Ministria e Transportit dhe Infrastrukturës bëri me dije se në vijim të marrëveshjes që Shqipëria dhe Mali i Zi nënshkruan në shkurt të këtij viti, në korrik pritet një tjetër hap.

Në samitin e Triestes në 12 korrik kryeministrat e 6 vendeve të Ballkanit do të nënshkruajnë një traktat të ri që ka në fokus konektivitetin mes tyre.

“Është e rëndësishme të theksojmë që më datë 10 shkurt të 2017 Shqipëria bashkë me Malin  e Zi qenë të parat vende që sigluan traktatin e komunitetit të transportit. Një dokument tepër i rëndësishëm që pritet të firmoset gjatë këtij samiti të nivelit të lartë në Trieste nga kryeministrat e gjithë vendeve të Ballkanit perëndimor. Traktati ka pjesë përbërëse të tij edhe legjislacionin, i cili duhet të përshtatët me legjislacionin shqiptar. Gjithashtu ky traktat synon të krijojë edhe kushte të favorshme për ta bërë sektorin e transporteve në Ballkanin perëndimor më efikas dhe me një ndikim pozitiv në rritjen dhe krijimin e vendeve të punës”, deklaroi Zana Josa, eksperte e Integrimit Europian MTI

Shqipëria nga ana tjetër ka vijuar me praktikën e prioritarizimit të projekteve në infrastrukturë sipas një metodologjie të nisur që nga vitit 2015.

Vetëm për vitin 2017 janë identifikuar 29 projekte që nisin nga rrugët, tek portet apo hekurudhat.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.