Sanksione të reja Koresë së Veriut – Trump: Po nuk funksionuan, bëhemi gati për fazën 2

Shtetet e Bashkuara të Amerikës kanë vendosur që t`i vënë sanskione shtesë Koresë së Veriut. Sipas Shtëpisë së Bardhë, kjo do të jetë paketa më e madhe e sanksioneve ndaj vendit, dhe ka për synim që të ushtrojë presionin e duhur ndaj Pyongyang-ut për t`u tërhequr nga programi i armatimit raketor dhe bërthamor.

Por, ajo që duket më shqetësuese është paralajmërimi i Donald Trump. Presidenti amerikan foli për fazën dy, që sipas tij do të jetë fatkeqe për botën dhe se do të vihet në jetë në rast se programi i ri i sanksioneve i Shteteve të Bashkuara nuk do të japë efektet e dëshiruara.

Paketa e re e sanksioneve përfshin edhe 28 kompani nga Kina, Taivani, Hong Kongu apo Singapori. Ndër të tjera, këto sanksione i ndalojnë firmave dhe individëve koreano veriorë si dhe atyre që janë pjesë e listës që të kenë asete në Shtetet e Bashkuara të Amerikës si dhe i ndalojnë shtetasve amerikanë që të negociojnë dhe të bëjnë biznes me ta.

Sipas departamentit amerikan të thesarit, këto sanksione kanë për qëllim që të shkatërrojnë tregtinë e kompanive koreano-veriore. Një raport i pak kohëve më parë i OKB nënvizonte faktin se, nëpërmjet disa mekanizmave, Korea e Veriut ia ka dalë që të shmangë sanksionet aktuale.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.