Sanofi zgjerohet në tregun e imunoterapisë. Blen Kymab për rreth 1.5 mld USD, që specializohet në trajtimin e kancerit
Prodhuesi francez i barnave, Sanofi, ka rënë dakord të blejë firmën britanike të imunoterapisë, Kymab, për 1.45 miliardë dollarë, ç’ka përbën marrëveshjen e fundit drejt zgjerimit në këtë fushë me rritje të shpejtë. Marrëveshja, që përfshin një pagesë direkte prej 1.1 miliardë dollarë, do t’i japë të drejta të plota tek terapia e antitrupave e quajtur KY1005 e Kymab, që shihet si me potencial për të trajtuar një varg të madh të çrregullimeve inflamatore dhe sëmundjeve të lidhura me imunitetin. Terapia KY1005 kaloi fazën e mesme të provave klinike në muajin Gusht. Çmimi i marrëveshjes mund të rritet me 350 milionë dollarë bazuar tek disa rezultate të caktuara, sipas një deklarate të Sanofi. Firma franceze nuk pati ndonjë ndryshim tek vlera në treg, pas kësaj marrëveshjeje.
Në muajin Nëntor, Sanofi shpenzoi 308 milionë euro për të blerë kompaninë holandeze të bioteknologjisë Kiadis, që është specializuar në produkte qelizore të imunoterapisë për të trajtuar kancerin. Në Gusht, bleu firmën amerikane të sëmundjeve autoimunitare, Principia BioPharma për 3.7 miliardë dollarë, pas një investimi prej 2.5 miliardë për të blerë grupin e trajtimeve imuno-onkologjike Sythorks në Dhjetor 2019. Sanofi është futur me vonesë në tregun e barnave të imunoterapisë, që aktivizojnë sistemin imunitar të trupit për të sulmuar qelizat tumorale. Tashmë firma po përpiqet të sigurojë një pjesë tregu dhe po përqendrohet tek disa medikamente që do t’i hapin rrugën. Barnat e Kymab përfshijnë gjithashtu produktin KY1044, një trajtim i kancerit që ndodhet në fazën e dytë të zhvillimit klinik.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.