Santander regjistron $13 mld humbje! Goditja më e madhe tek një bankë europiane nga Covid-19
Banka spanjolle Santander, raportoi një humbje neto rekord prej 11.1 miliardë euro në tremujorin e dytë, duke pësuar goditjen më të madhe deri më tani nga një bankë europiane prej krizës së koronavirusit. Banka e dytë më e madhe në Eurozonë matur nga vlera e tregut, deklaroi këtë javë se ka regjistruar penalitete të njëhershme prej 12.6 miliardë euro, ndërkohë që përkeqësimi ekonomik i shkaktuar nga pandemia e koronavirusit e ka detyruar bankën që të reduktojë vlerën e aktiveve.
Tregjet bazë të Santander, nga Brazili në Spanjë, janë nga më të goditurit nga pandemia dhe valutat e dobëta në zhvillim e kanë përkeqësuar situatën. Nga totali i dëmeve, 10.1 miliardë euro lidhen me vullnetin e mirë dhe 2.5 miliardë euro me aktive të shtyra tatimore (DTA), një instrument që i jep lehtësi tatimore kompanive kur raportojnë humbje. Banka theksoi se humbjet nuk do të kenë ndikim tek nivelet e kapitalit, ndërkohë që raporti i mjaftueshmërisë së kapitalit u rrit në 11.46% në Qershor nga 11.33% në Mars, pas zbatimit të plotë të standardeve të reja të kontabilitetit. Santander përsëriti udhëzimin për koston e riskut, një tregues i kostos së sigurimit të librit të kredisë, mes 130 -150 pikë bazë deri në fund të vitit 2020, pasi u rrit në 126 pikë në Qershor, nga 100 që ishte në Mars. Aksionet e Santander ranë me 3.5%, duke u kthyer në performuesin më të keq në indeksin e titujve të kapitalit në Spanjë gjatë sesionit tregtar.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.