Saranda përfshihet në “krocierën e çiklizmit” – Kampionët e botës udhëheqin turin amator
Përfshirja e bregdetit shqiptar në turet me krocierë ka filluar të bëhet gjithmonë e më e shpeshtë, teksa edhe markat më të njohura në këtë sektor shtojnë një nga një ndalesat në vendin tonë.
Nga data 14 deri në 21 Tetor, rreth 140 çiklistë amatorë dhe ish-profesionistë janë në një tur të Mesdheut, ku në çdo qytet ku zbarkojnë zhvillojnë etapën e radhës.
Këtë vit ndalesa përfshin edhe Sarandën, me një garë rreth 75 kilometra, e cila do të zhvillohet nën kujdesin e Federatës Shqiptare të Çiklizmit dhe me mbështetjen e Bashkisë së Sarandës.
“Krociera e 9-të çiklistike” do të zhvillohet në dy cirkuite, që do të përshkojë itineraret: nga porti i Sarandës-Çukë,-Vrion-Çlirim-Finiq-Blerimas-Buronjë-Karahaxh-Qafëgjashtë- Metoq-Lëkurës (34.6 km) dhe porti i Sarandës- Çukë-Dritas-Vurgu i Ri-Xarrë-Mursi- Çiflik-Vagalat-Dobro-Livadhja-Dermish-Fitore-Krane-Çlirim-Blerimas-Karahaxh-Qafëgjashtë- Lëkurës (75.9 km).
Bashkia njofton se aktiviteti do të nisë në orën 12:45 dhe i njofton drejtuesit mjeteve se këto akse do të lirohen pasi të ketë kaluar peletoni.
“La Crociera Del Ciclismo” është një mundësi për sportdashësit të marrin biçikletën e tyre me pushime dhe të takojnë ish-kampionë si Paolo Bettini, 2 herë Kampion i Botës dhe Kampion Olimpik, si edhe Maurizio Fondriest, kampion bote.
Pas Sarandës, etapa e radhës do të zhvillohet në Dubrovnik, për të përfunduar sërish në pikën fillestare në Venecia. Qytetet e tjera të përfshira ishin Bari, Olimpia, Mikonos dhe Athina.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.