Scholz kundërshton Merkel: “Paketa e Rimëkëmbjes është një plan afatgjatë për një Europë më të mirë”
Ministri gjerman i financave Olaf Scholz tha se paketa e rimëkëmbjes së Bashkimit Evropian është një masë afatgjatë sesa një rregullim afatshkurtër i krizës koronavirus, duke kundërshtuar pikëpamjen e kancelares Angela Merkel, raporton AFP.
“Fondi i rimëkëmbjes është një hap i vërtetë përpara për Gjermaninë dhe për Evropën, një gjë për të cilën nuk do të kthehemi”, tha Scholz, i cili është gjithashtu kandidati i Partisë Social Demokratike (SPD) i qendrës së majtë për të pasuar Merkel në zgjedhjet e vitit 2021.
Hapat e ndërmarrë sipas planit, përfshirë vendet e BE-së që bien dakord për emetimin e përbashkët të borxhit “përfaqësojnë ndryshime thelbësore, ndoshta ndryshimet më të mëdha që nga futja e euros” si monedhë e vetme rreth fundit të mijëvjeçarit, tha Scholz.
“Këto hapa përpara do të çojnë në mënyrë të pashmangshme në një debat mbi burimet e përbashkëta për BE, diçka që është një kusht për një Bashkim Evropian të përmirësuar që funksionon më mirë,” shtoi ai.
Debate të gjata dhe intensive u deshën përpara se 27 vendet e BE të arrinin marrëveshje në korrik për skemën e tyre historike të rimëkëmbjes prej 750 miliardë eurosh, më shumë se gjysma e të cilave do të paguhen si grante të drejtpërdrejta.
Për herë të parë, udhëheqësit i dhanë dritën e gjelbër borxhit të përbashkët – një ide që Gjermania e kishte refuzuar prej kohësh derisa pandemia e Covid-19 goditi shumë ekonomi evropiane që kishin kaluar tashmë një dekadë duke luftuar për t’u rikuperuar nga kriza e fundit financiare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.