Së shpejti ne do të mund të përjetojmë realitetin siç e duam! Por a është një gjë e mirë kjo?
Syri i njeriut është një organ i jashtëzakonshëm i pajisur me më shumë se 120 milion receptorë, që mund të dallojnë mbi 10 milion ngjyra të ndryshme dhe është muskuli më i shpejtë në trupin e njeriut.
Për të gjitha mrekullitë e tij syri i njeriut nuk ka evoluar mjaftueshëm gjatë këtij mijëvjeçari pavarësisht se kemi krijuar syzet dhe teleskopët, shikimi mbetet i njëjtë me atë që paraardhësit tanë në lashtësi kishin.
Mirëpo, kjo pritet të ndryshojë në mënyrë radikale pasi kompanitë e teknologjive duke filluar nga Apple po hedhin idenë e syzeve, të cilat pritet të ndryshojnë realitetin, për ta parë atë ashtu siç ne dëshirojmë.
Imagjinoni këtë: jeni duke ecur në rrugë dhe shihni një mbeturinë ose një jashtëqitje qeni, këto syze menjëherë mund ta transformojnë këtë pamje në diçka që juve ju pëlqen si për shembull një vazo me lule ose në një send tjetër të dëshirueshëm.
Imagjinoni dhe këtë: pasi kaloni një lidhje vërtet të keqe romantike me një person, ju nuk dëshironi ta shini më me sy atë. Herës tjetër kur ta shihni në rrugë këto syze do t’ju mundësojnë që në vend të këtij personi të shfaqet vetëm një fantazmë, në kuptimin e vërtetë të fjalës dhe në këtë mënyrë ju do të mbani llafin për të mos e parë më kurrë me sy.
Një skenar tjetër është edhe kur humori juaj është vërtet i ulët dhe depresiv. Këto syze do të vërejnë nëpërmjet sensorëve se moti i vrenjtur ju shkakton këtë gjendje. Menjëherë ato përpiqen të ndryshojnë pamjen e qiellit duke sjellë tek ju një diell pranvere, që pritet t’ju ngrejë disi humorin.
Mund të duket si diçka “magjike”, por në të vërtetë po kthehet në një realitet dhe kompani të fuqishme po investojnë në programe softëare për pajisje të tilla, në një treg që pritet të ketë një vlerë prej 30 bilion dollarësh në vitin 2030. E gjitha kjo po bëhet e mundur edhe falë Inteligjencës Artificiale, e cila lehtëson avancimin e teknologjive kaq të përparuara.
Mirëpo a është ndryshimi i realitetit tonë nëpërmjet syzeve diçka e mirë?
Sigurisht si çdo teknologji edhe kjo e fundit ka pasojat e veta.
E para është rrezikimi i privatësisë. Që tani qeveritë dhe bizneset nëpër botë kanë të instaluar kamera, të cilat mund të gjurmojnë lëvizjet tona. Në këtë mënyrë në projektimin e teknologjive kaq të avancuara duhen ligje vërtet të forta për të mos lejuar rrjedhjen e informacioneve personale të njerëzve dhe “gjurmimin” e tyre. Çdokush ka të drejtë të harrohet dhe të lihet në qetësinë e tij.
Së dyti është frika se këto syze do të njohin të gjitha dëshirat tona të brendshme, të cilat na kthejnë automatikisht në “viktima” të kompanive të mëdha që i marrin këto të dhëna dhe përpiqen të reklamojnë produkte, të cilat ata mendojnë se i duam. Kjo quhet bindje e jashtëligjshme e konsumatorit.
Së treti pritet që këto syze mund t’i shkaktojnë njerëzve edhe efekte haluçinante, pasi të përpiqesh gjithmonë të ndryshosh realitetin sjell pasoja në jetën tënde dhe marrëdhëniet me njerëzit.
Burimi QZ/ Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.