Së shpejti nis puna për segmentin që lidh rrugët “Siri Kodra” dhe “Jordan Misja” – Do të kalojë përmes Bulevardit të Ri
Bashkia e Tiranës ka nisur procedurat e tenderimit për shoqërinë që do të kryejë punimet për ndërtimin e rrugës që lidh përmes Bulevardit të Ri, rrugët “Siri Kodra” dhe “Jordan Misja”.
Për projektin është vendosur në dispozicion një fond prej 41.6 milionë lekësh, ndërsa kohëzgjatja e punimeve do të jetë rreth 4 muaj, çka do të thotë se rruga lidhëse me shumë gjasa do të përfundojë në fund të kësaj vjeshte.
Përmes këtij segmenti të ri bëhet i mundur spostimi i trafikut aktual të rrugës “Siri Kodra” në drejtim të Lumit të Tiranës. Gjatësia e rrugës së re është 450 metra dhe shtrihet mbi një terren, i cili është përdorur më parë për destinacion bujqësor.
Rruga do të ketë vetëm nga një korsi për çdo drejtim dhe trotuar në njërën anë, me perspektivën për t’u zgjeruar në krahun tjetër të rrugës në të ardhmen.
Projekti parashikon pastrimin e gjurmës së rrugës nga mbeturina inerte të shkarkuara në këto zonë, si dhe prishjen e dy objekteve në zonën ku lidhet me Bulevardin e Ri të Tiranës.
Angelo Haruni/SCAN
Parku i ri qendror në Tiranë – Veliaj: Bashkia do të transferohet në Bulevardin e Ri
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.