Sejko flet për Reuters: Shqipëria kërkon që Euro të jetë “violinë” e dytë e Lekut

Banka qendrore e Shqipërisë dëshiron që t’i vërë fre përdorimit të euros në mënyrë që politika monetare të funksionojë më mirë dhe të mbrojë sistemin e saj bankar nga luhatjet dhe tronditjet e kursit të këmbimit.

Kështu ka deklaruar guvernatori i Bankës së Shqipërisë, Gent Sejko për Agjencinë e lajmeve “Reuters” duke shtuar se nuk bëhet fjalë për të hequr euron nga ekonomia e Shqipërisë, e cila është kandidate për t’iu bashkuar Bashkimit Europian, por plani është që të shtojë sasinë e lekut në financë dhe ekonomi.

“Fillimisht, ne duam të shtojmë fleksibilitetin dhe efikasitetin e politikës sonë monetare në monedhën vendase. Politika jonë stimuluese monetare do të transmetohej më mirë në qoftë se do të kishte më tepër transaksione në monedhën vendase,” deklaroi Sejko.

Banka gjithashtu dëshiron të ruajë dhe mbrojë stabilitetin financiar meqenëse një sasi e madhe e huadhënies në euro do të ekspozonte sistemin bankar shqiptar ndaj risqeve të kursit të këmbimit, shtoi ai.

Një dekadë më parë, 80% e huadhënies ishte në monedhë të fortë, kryesisht në euro, dhe pjesa tjetër në lekë, por kjo normë ka ndryshuar në 55% në euro dhe 45% për qind në lekë, e ndihmuar nga një normë interesi e ulur në nivelin më të ulët historik prej 1.25%.

“Ne synojmë të shtojmë përdorimin masiv dhe ekspozimin e monedhës vendase në një masë të krahasueshme me vendet me një ekonomi të ngjashme me tonën në një mënyrë graduale,” tha Sejko.

Guvernatori gjithashtu shtoi se marrëveshja trevjeçare me FMN-në prej 330 milionë euro ndihmoi në koordinimin më të mirë të politikës monetare dhe fiskale, solli një rritje të qëndrueshme dhe një kontroll më të mirë të borxhit publik. Sejko shtoi se qeveria që do të formohet pas 25 qershorit duhet të fokusohet mbi reformat strukturore.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.