Sektori bankar, krahasimi me rajonin – Banka Qendrore e Austrisë: Shqipëria ndër të parat në rajon për kreditimin e sektorit privat
Shqipëria dhe Kosova janë vendi i tretë dhe i dytë në rajon, pas Serbisë me rritjen më të madhe vjetore të kreditimit të sektorit privat, thotë Banka Qendrore e Austrisë në raportin më të fundit për integrimin europian të tremujorit të dytë të vitit. Kështu, për Shqipërinë, të dhënat flasin për një rritje vjetore të kreditimit të sekorit privat jo-bankar, prej 5.9% gjatë tremujorit të fundit të vitit të kaluar.
Kjo normë është më e lartë vetëm në Kosovë, me 7.1% dhe në Serbi me 10.9%. Maqedonia e Veriut, Mali i Zi dhe Bosnje Hercegovina ndërkohë raportojnë norma më të ulta rritje. Shqipëria dhe Kosova rezultojnë gjithashtu ndër vendet që në asnjë tremujor që prej shpërthimit të pandemisë nuk raportojnë norma negative të këtij treguesi. Kreditimi i sektorit privat nga institucionet huadhënëse shihet me mjaft rëndësi për ekonominë e një vendi, sidomos në kohë krize, pasi kontribuon në zbutjen e krizës dhe procesin e rimëkëmbjes.
Një tjetër e dhënë, ajo e kredive jo performuese e vendos Shqipërinë në krye të rajonit sa i përket përmirësimit të këtij treguesi që nga viti 2018. Për Shqipërinë, përmirësimi fiksohet në 3 pikë përqindje, duke marrë për bazë periudhën e fundit të raportuar nga Banka Qendrore e Austrisë, që është tremujori i fundit i vitit të kaluar, e që flet për një normë pranë 8.2%. Aktualisht kjo normë në vendin tonë ka zbritur pranë 7.9%. Përmirësimi i këtij treguesi në harkun e dy viteve e vendos kështu Shqipërinë të parën në rajon. Ndjek Bosnje Hercegovina me 2.7 pikë përqindje përmirësim, dhe Maqedonia e Veriut me 1.6 pikë përqindje. Kosova është e fundit me 0 pikë ndryshim, por duke qëndruar e para në rajon sa i përtej kësaj normë në total, në vetëm 2.7%.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.