Sektori bankar – Sejko në mbledhjet e FMN-BB: Ristrukturimi është zhvillim pozitiv. Do të ndihmojë në rritjen e konkurrencës
Ristrukturimi i sektorit bankar është zhvillim pozitiv që pritet të ndihmojë në rritjen e konkurrencës dhe krijimin e kushteve të nevojshme për nxitjen e ritmit të kreditimit në vend. Këtë e ka bërë të ditur kreu i Bankës së Shqipërisë, Gent Sejko në mbledhjet e Pranverës të Fondit Monetar Ndërkombëtar dhe të Grupit të Bankës Botërore në Uashington.
Sipas Sejkos, ky sektor përshkoi një fazë ristrukturimi me futjen e aktorëve të rinj dhe bashkimin e disa bankave. Ndërsa u ndal te rritja ekonomike, kreu i BSH-së tha se ka vazhduar trendin pozitiv, mbështetur dhe nga politika monetare stimuluese e Bankës së Shqipërisë.
Ndërkohë, theksoi ndër të tjera se ruajtja e inflacionit në 3& mbetet edhe objektivi kryesor i BSH-s, duke shtuar se sipas parashikimeve të kësaj të fundit inflacioni pritet të kthehet në objektiv brenda vitit 2020.
Roli i BSH-së si Autoritet i Ndërhyrjes së Jashtëzakonshme që po vijon të marrë trajtë nëpërmjet zhvillimit të kuadrit nënligjor, në zbatim të ligjit “Për rimëkëmbjen dhe ndërhyrjen e jashtëzakonshme” ishte një tjetër çështje që u trajtua nga Guvernatori gjatë mbledhjeve.
Më konkretisht, puna e Banka e Shqipërisë në këtë drejtim ka konsistuar në hartimin e planeve të ndërhyrjes së jashtëzakonshme, krijimin e burimeve të reja të financimit për menaxhimin e krizave financiare, si dhe identifikimin e të gjithë elementeve të nevojshme të gatishmërisë për zbutjen e tyre.
Ndërkohë, në përfundim të takimeve ndërsa përgëzuan Bankën e Shqipërisë për kontributin në zhvillimin makroekonomi të vendit dhe stabilitetin financiar të tij, përfaqësuesit e institucioneve ndërkombëtare theksuan se BSH duhet të vazhdojë hapat e ndërmarrë lidhur me planin e masave për reduktimin e kredive me probleme, nxitjen e kreditimin dhe stimulimin e përdorimit të monedhës kombëtare.
Gjithashtu, përfaqësuesit e FMN-BB- së theksuan rëndësinë e bashkërendimit në vazhdimësi të politikës monetare me atë fiskale. Ky bashkërendim ndihmon në forcimin e stabilitetit makroekonomik të vendit dhe rritjen ekonomike afatgjatë.
Në mbledhjet e zhvilluara në datat 12-14 prill, morën pjesë guvernatorët e bankave qendrore dhe ministrat e financave të vendeve anëtare, drejtues të lartë të institucioneve financiare ndërkombëtare, si dhe përfaqësues të botës akademike, biznesit dhe shoqërisë civile.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.