Sektori i ujit 5 vjet pas reformës – ERRU: Ka ende shoqëri që nuk kanë përfunduar riorganizimin, duhet agregim
Pavarësisht se kanë kaluar 5 vjet nga miratimi i Vendimit të Këshillit të Ministrave për reformën në sektorin e ujit, ende ka shoqëri që nuk e kanë përfunduar riorganizimin”. Konstatimi vjen nga Enti Rregullator i Ujit, që thekson se shoqëritë ekzistuese dhe ato të reja të krijuara, u përballën me sfida dhe vështirësi në drejtim të procesit të inventarizimit, vlerësimit dhe regjistrimit të aseteve dhe më pas regjistrimi i tyre në QKB, si rezultat i mungesës së dokumentacionit përkatës nga ish komunat. Gjithashtu, sipas ERRU-së, pajisja me Akt-Miratime Higjieno-Sanitare, përfshirë dhe zonën e shtuar rurale, ka qenë veçanërisht problem për shoqëritë UK pas riorganizimit.
Kjo pasi, shoqëritë kanë zgjeruar zonën e shërbimit me zona shtesë rurale, që kanë asete mjaft të amortizuara të sistemeve të furnizimit me ujë. Procesi i riorganizimit, parashikonte gjithashtu që brenda 3 muajve nga përfundimi i tij, shoqëritë duhet të aplikonin pranë Entit Rregullator të Ujit për licencim dhe miratimin e tarifave të reja për të gjithë zonën e re të shërbimit, gjë e cila ka qenë pengesë për të aplikuar për tarifa të reja. Sipas të dhënave zyrtare, deri më tani, kanë përfunduar riorganizimin dhe janë licencuar nga ERRU sipas reformës 39 nga 57 shoqëri UK.
Ndërkohë që, për vazhdimësinë e reformës në sektorin e ujit dhe përmirësimin e situatës në sektor ERRU rithekson nevojën e agregimit të sektorit. Sipas këtij dikasteri, për këtë duhet angazhimi i fortë institucional i pushtetit qendror dhe atij vendor ku fillimisht, të realizohen 2-3 agregime të suksesshme, pas një studim anketimi të gjithë bashkive të vendit, sipas principit “në baza vullnetare dhe me incentiva nga qeveria qendrore”.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.