Selami Xhepa për “Argument”: 3 këshilla si klima ekonomike e Shqipërisë mund të përmirësohet!
I ftuar në emisionin ‘Argument’ nga Enio Civici, Presidenti i Universitetit Evropian të Tiranës, Z. Selami Xhepa u shpreh lidhur me situatën ekonomike në Shqipëri, ku ndër të tjera theksoi disa mënyra se si ajo mund të përmirësohet.
Fillimisht i pyetur mbi kreditë, Z.Xhepa është shprehur se problemi me to është që nuk i drejtohen investimeve afatgjata në sektorin privat, por konsumit dhe banesave, çka nuk kontribuon në një ekonomi të qëndrueshme dhe efektive. “Duhet të krijohet një marrëdhënie më e mirë mes bankave dhe biznesit, sepse në kushtet ku jemi tani, në të ardhmen të dy sektorët mund të përballen me kriza.”
Si thirrje ndaj vendimmarrësve, Z.Xhepa ka theksuar se ndaj huasë dhe borxhit publik duhet të ketë një kujdes të veçantë. “Pas zgjedhjeve të vitit të ardhshëm duhet të shohim politika me këmbë në tokë referuar borxhit publik, pasi nëse nuk merren masat ai mund të ndikojë në përkeqësimin e klimës ekonomike”.
Këshillën e fundit Z. Xhepa ia drejtoi konsumatorëve, për të cilët tha se duhet të fillojnë të konsumojnë për të ndezur motorin ekonomik. “Patjetër që duhet kursyer për ditët me shi, por qytetarët duhet të fillojnë të konsumojnë pas rikthimit të një gjendje normaliteti. Ne të gjithë mund të kontribuojmë në një ekonomi më të mirë.”, ka përfunduar Z.Xhepa.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.