Senati “godet” më rëndë ekonominë ruse – SHBA heq statusin tregtar të vendit më të favorizuar për Rusinë dhe Bjellorusinë!

Senati i Shteteve të Bashkuara ka vendosur ta “godasë” më tej ekonominë e Rusisë, duke votuar unanimisht për heqjen e statusit tregtar të vendit më të favorizuar për Rusinë dhe aleatin e ngushtë Bjellorusinë, në një projektligj dhe duke ndaluar importet e naftës në një tjetër.

Senati votoi me 100 vota në favor të masës që heq statusin e Marrëdhënieve Normale të Përhershme Tregtare dhe menjëherë, mbështeti masën e energjisë, gjithashtu me një rezultat 100 me 0.

Miratimi i senatit dërgoi në Dhomën e Përfaqësuesve dy projektligje, ku pritet kalimi dhe hapi i radhës do të jetë Shtëpia e Bardhë, ku presidenti Joe Biden të nënshkruajë projektligjet.

Udhëheqësit demokratë të Senatit fillimisht nuk e paraqitën për votim masën për energjinë, duke bërë që republikanët të refuzojnë miratimin e projektligjit  të tregtisë pa një garanci për votim mbi legjislacionin e naftës.

Ligji i Shteteve të Bashkuara kërkon që Kongresi duhet të miratojë ndryshimet në statusin tregtar të Rusisë dhe Bjellorusisë.

Senatorët njoftuan një kompromis në mes të javës, ku ranë dakord të marrin në konsideratë si masën tregtare ashtu edhe atë ndaj energjisë.

Dhoma pritet të rishqyrtojë dy projektligjet për shkak të ndryshimeve teknike të bëra në Senat.

Blerta Lata / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.