Sërish protesta të shumta në Gjermani – Qytetarët refuzojnë masat antiCovid

Kritikët e masave të shtetit kundër pandemisë kanë dalë sërish në rrugë, në shumë qytete të Gjermanisë dhe një numër veçanërisht i madh i protestuesve është regjistruar në lindje të vendit. Në Mecklenburg-Pomerani kanë protestuar sipas një zëdhënësi të policisë, rreth 12.000 njerëz në më shumë se 20 qytete. Ata kanë marrë pjesë në shëtitje, tubime dhe marshime të heshtura, si dhe në tubime të cilat nuk kanë pasur lejen e autoriteteve. Në Rostock, disa njerëz u përpoqën të ndryshojnë rrugën e planifikuar të demonstratave dhe të thyejnë barrierat e policisë. Kjo është evituar me përdorimin e “dhunës së thjeshtë fizike” dhe shkopinjve, njoftuan njësitë policore.

Në Tyringji sipas të dhënave zyrtare kanë protestuar rreth 16.000 njerëz kundër masave kufizuese. Autoritetet njoftojnë se në disa vende janë shënuar incidente të vogla, por pa pasoja serioze. Në të gjitha protestat bëhej fjalë për të ashtuquajturat “shëtitje” të cilat nuk ishin paralajmëruar.

Mijëra njerëz kanë shprehur pakënaqësinë e tyre kundër masave kufizuese edhe në Saksoni. Në Dresden dhe Leipzig është dashur të ndërhyjë policia për të shpërndarë grumbullimet e mbajtura pa leje. Protesta ka pasur edhe në Brandenburg. Aleanca “Potsdami tregon ngjyrat e shumta” ka bërë thirrje që qyteti të mos lejohet të bie në duart e kundërshtarëve të masave kufizuese.

Qindra kritikë të masave në Berlin kanë protestuar kundër masave kufizuese para studios së Televizionit të Dytë kombëtar Gjerman (ZDF). Ata kanë hedhur edhe parulla “shtypi gënjeshtar”. Shoqata Gjermane e Gazetarëve informoi në Twitter se bëhej fjalë për një “pakicë të vogël radikale të kundërshtarëve të vaksinave, mohuesve të koronavirusit, urrejtësve të medias dhe antidemokratëve”.

Një sërë demonstratash u zhvilluan edhe në shtetet perëndimore të Gjermanisë. Vetëm në Nuremberg në Bavari u mblodhën 4000 njerëz – dukshëm më shumë se sa pritej. Protestat kanë kaluar të qeta dhe “pa probleme”, thuhet në njoftimet zyrtare. DW

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.