Sërish rekord infektimesh në Indi – Shumë shtete imponojnë bllokime më të rrepta
India të shtunën raportoi numrin e saj më të lartë ditor të infektimeve nga COVID-19, e ndërsa rastet vazhduan të rriteshin mjaft shtete vendosën bllokime më të rrepta.
Ministria e Shëndetësisë raportoi 4,187 viktima gjatë 24 orëve të fundit, duke e çuar numrin e përgjithshëm të vdekjeve në rreth 240,000. Rastet u rritën me 401,078, duke rritur totalin që nga fillimi i pandemisë në 21,9 milionë. Ekspertët thonë se numri real i rasteve dhe fataliteteve me COVID-19 ka të ngjarë të jetë shumë më i lartë se shifra zyrtare.
Shteti Tamil Nadu, i njohur për prodhimin e veturave do të kalojë nga një bllokim i pjesshëm në një bllokim të plotë të hënën, duke ndaluar transportin publik dhe mbyllur njësitë e shitjes me pakicë.
Shteti fqinj Karnataka zgjati një mbyllje totale të premten. Kryeqyteti i këtij shteti, Bengaluru është një qendër kryesore e teknologjisë, shtëpia e zyrave kryesore të kompanive duke përfshirë Google, Amazon dhe Cisco.
Qeveria qendrore ende nuk ka vendosur një bllokim kombëtar siç bëri gjatë valës së parë të pandemisë vitin e kaluar, por rreth gjysma e të gjitha shteteve të saj kanë vendosur një mbyllje totale. Pjesa tjetër janë nën një mbyllje të pjesshme.
Megjithëse është prodhuesi më i madh i vaksinave në botë, India po lufton për të prodhuar dhe shpërndarë doza të mjaftueshme për të ndaluar këtë valë të COVID-19.
Megjithëse vendi ka administruar mbi 167 milionë doza vaksinash, shkalla e vaksinimit ka rënë ndjeshëm ditët e fundit dhe vetëm rreth 2% e 1.4 miliard shtetasve kanë marrë të dy dozat e nevojshme për tu imunizuar plotësisht.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.