Sesioni i ri parlamentar, Baraj: Parlamenti të kthehet në vlerën reale të komunikimit. Ngrihet Komisioni i Verifikimit të Mandateve

Në çelje të këtij sesioni parlamentar, drejtuesi i seancës plenare Besnik Baraj bëri thirrje që parlamenti të krijojë besimin e duhur dhe të ngrihet mbi interesat personale, dhe kjo sipas tij duhet shprehur me vepra.

“Në këtë Kuvend kam pasur nderin të ndjek përshëndetjet e shumë personaliteteve që janë përpjekur të përcjellin tolerancë dhe qytetërim. Ata kanë një gjë të përbashkët, interesat e atdheut të tyre. Kështu edhe ne duhet të krijojmë besim për vendin, puna në këtë Kuvend të ngrihet mbi interesat personale e shprehur me vepra”.

Baraj më tej pohoi se konfliktualiteti brenda politikës shpesh është reflektuar edhe në popull.

“Të ndërtojmë modele të reja dhe t’ i bëjmë konfliktet e mëparshme të padobishme. Parlamenti të kthehet në vlerën reale të komunikimit”.

Më pas në rolin e drejtuesit të seancës plenare, Baraj ka thirrur tre deputetët më të rinj në moshë për të qenë në krye të Sekretariatit të Kuvendit.

Konkretisht më të rinjtë ishin deputetët:

Anduel Xhindi;

Izmira Ulqinaku;

Kejdi Mehmetaj

Ngrihet Komisioni për Verifikimin e Mandateve, i cili do të përbëhet nga 9 deputetë, 5 nga maxhoranca dhe 4 nga opozita.

Në krye të këtij komisioni është caktuar deputetja e Partisë Socialiste, Vasilika Hysi, ndërkohë në postin e nënkryetarit është caktuar deputeti i PD, Gent Strazimiri:

Përbërja: 

Vasilika Hysi, kryetare e Komisionit (PS)
Gent Strazimiri, zëvëndëskryetar (PD)
Adnor Shahmeti, sekretar (PS)
Klotilda Bushka, (PS)
Ulsi Manja, (PS)
Alket Hyseni (PS)
Luçjano Boçi,(PD)
Ervin Salijani (PD)
Vangjel Tavo  (LSI)

Komisioni do të bëjë mbledhjen e tij dhe do të marrë dokumentacion përkatës të zgjedhjeve për të bërë verifikimin e mandateve të deputetëve dhe t’i paraqesë Kuvendit të seancën plenare, raportin për vlefshmërinë e mandateve të deputetëve.

Në orën 18.00 pritet të mbahet seanca e dytë parlamentare kur do të bëhet edhe betimi i deputetëve të rinj, si dhe zgjedhja e kryetarit të Kuvendit.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.