Sesioni i tretë në rritje – Nafta mbështetet nga tensionet në Lindjen e Mesme
Çmimet e naftës po qëndrojnë në rritje për të tretin session me radhë, për shkak të shqetësimeve që kanë të bëjnë me tensionet në Lindjen e Mesme, që mund të çrregullojnë furnizimin e tregut me naftë.
Këto tensione kanë eklipsuar të dhënat e publikuara në SHBA, që treguan një rritje të rezervave javën e kaluar. Nafta Brent e Londrës po tregtohet në rreth 72.3 dollarë për fuçi, ndërsa nafta Bruto amerikane po tregtohet në rreth 62.4 dollarë për fuçi. Çmimet po gjejnë një mbështetje nga rreziku për konfliktet në Lindjen e Mesme. Të mërkurën, Shtetet e Bashkuara evakuuan stafin nga ambasada amerikane në Irak, për shkak të kërcënimeve nga Irani.
Referuar të dhënave në SHBA, rezervat e naftës u rritën në nivelin më të lartë që nga viti 2017. Gjithashtu, në treg ka paqartësi mbi vendimin që do të marrë OPEC për uljen ose jo të prodhimit në gjysmën e dytë të vitit 2019. Gjatë këtij viti, çmimet e naftës janë rritur me rreth 30%, pikërisht për shkak të marrëveshjes së OPEC dhe Rusisë për të ulur prodhimin me 1.2 milionë fuçi në ditë. Organizata e vendeve Eksportuese të Naftës deklaroi se kërkesa globale për naftë do të jetë më e lartë se parashikimet gjatë këtij viti.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.