Sezoni turistik hapet në Prill/Klosi rendit problematikat. Lleshaj: Nuk do të funksionojnë plazhet që s’plotësojnë kriteret ligjore

Sezoni turistik do të nisë në Prill dhe do të përfundojë në muajin Tetor. Ministria e Brendshme dhe ajo e Turizmit dhe Mjedisit zhvilluan një takim me 12 prefektët për diskutuar mbi masat për të pasur një sezon turistik cilësor dhe të sigurt gjatë 2019.

“Ne nuk jemi më Shqipëria që turizmin e fillon më 15 korrik dhe e mbaron më 15 gusht, ne jemi Shqipëria që falë përpjekjes të madhe që kanë berë tur-operatorët kemi një realitet komplet tjetër. kontratat e operatorëve turistik të lidhura me autoritetet shqiptare fillojnë që në fillim të muajit prill. Pra fillimi i muajit Prill deri ën muajin Tetor është sezoni turistik. Prandaj dhe përpjekjet që janë bërë për të dakordësuar në nivele zyrtare, sezoni turistik duhet të trajtuar në këtë diapazon kohë. Nga prilli deri në tetor Shqipëria është e synuar dhe kontraktuar nga tur-operatorët e huaj”, deklaroi ministri i Turizmit dhe Mjedisit, Blendi Klosi.

Klosi u ndal te të gjitha problematikat që has turizmi, duke theksuar se të gjitha ndërhyrjet s’duhet të kryhen para fillimit të sezonit turistik dhe jo në mes të pikut.

“Ne kemi ndërmarrë sëbashku me të 12 perfektët një fushatë të gjerë tashmë 100 ditët, dashuri për pemët, dashuri për mjedisin nën logon krijo oksigjenin tënd. ne do vazhdojmë aksionin deri në datën 22 prill, që është dhe Dita e Tokës.

-Ne 100, aksioni ka të bëjë me: Inspektimin, sektorët që ne kemi identifikuar si zona më të frekuentuara nga turistët të kontrollohen nga inspektoratet disa herë. Së dyti problematikë tjetër, është standardi i stacioneve të plazhit.

-Në vitin 2018 realizuam 247 kulla vrojtimi. Që në muajin prill të kemi sistemin e vrojtimit të ngritur, jo më në pikun e sezonit.

-Së treti dakordësi me prefektët për të rritur sigurinë në vendet turistike, për të mos shënuar asnjë incident.

-Po ashtu së bashku me prefektët dhe kryetarët e bashkive të bëjmë ndarjen e pikave të shfrytëzimit të rërës. Është e pafalshme për një vend që pretendon të jetë vend turistik të mos ketë ndarjen e shfrytëzimit të rënës në plazhet tona. Kjo punë të ndodhi para se sezoni të fillojë.

-Po ashtu ne kemi një çështje të pazgjidhur që lidhet me problematikën e zhurmave. Është shqetësim që na vjen nga tur-operatorët. Para fillimit të sezonit prefektët me kryetarët e bashkive duhet të vendosin se cilat janë zonat ku lejohet, oraret dhe fashat e ndryshme”.

Nga ana tjetër ministri i Brendshëm Sandër Lleshaj deklaroi se asnjë segment plazhi nuk do jetë funksional nëse nuk plotëson kriteret e përcaktuara ligjore.

“Ky është një vit i rëndësishëm për Shqipërinë pasi presim konsultim për hapjen e negociatave. Kështu që një sezon i mirë turistik është një imazh i mirë. Që ditën e parë të fillimit të sezonit turistik, monitorimit do të jetë i tillë që të garantojë që në asnjë segment plazhi nuk fillon funksionimi pa patur të gjithë infrastrukturën e sigurisë sipas ligjit. Nuk ka nevojë as për lenie kohe as për negociata. Kohën dhe afatin e dinë, ata që duan të ofrojnë shërbime duhet të plotësojnë edhe kushtet konform ligjeve”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.