Sezoni turistik – Klosi në Durrës: Nga 1 korriku, kontrolle për sigurinë dhe ndotjen akustike

Prej datës 1 korrik nuk do të ketë asnjë tolerancë apo negocim për  ata që shkelin zonat e përcaktuara për mjetet lundruese, për subjektet që nuk kanë rojet e plazhit por edhe për lokalet, apo baret që shkaktojnë ndotje akustike dhe shkelin rregullat e vendosura nga bashkia. Kreu i Turizmit dhe Mjedisit  Blendi Klosi gjatë takimit  të Komitetit Rajonal të Turizmit në qarkun e Durrësit, u ndal në 3 detyrat kryesore të institucioneve të angazhuara në mbarëvajtjen e sezonit turistik: garantimi maksimal i pastërtisë, siguria në plazhe dhe rritja e standardeve të mikpritjes.

I pranishëm në takim Ministri i Bujqësisë dhe Zhvillimit Rural, Niko Peleshi theksoi se sfida e këtij sezoni është siguria ushqimore për të cilën kreu i bujqësisë tha se është forcuar inspektimi, i paraprirë nga vetëkontrolli i subjekteve.

Ndërsa Ministri Majko kërkoi nga Task Forca e turizmit që të merren të gjitha masat e nevojshme për të garantuar sigurinë pa shqetësuar turistët vendas dhe të huaj.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.