Sezoni turistik, Rama: Të përgatitur si asnjëherë më parë – Sfidat, oferta e ulët dhe diversifikimi
Sot në Tiranë nisi edicioni i dytë i Panairit Mesdhetar të Turizmit, ku operatorë vendas dhe nga i gjithë rajoni i Mesdheut prezantuan ofertat e tyre në prag të sezonit turistik.
Çelja e eventit u përshëndet edhe nga Kryeministri Edi Rama dhe ministrat Klosi dhe Peleshi.
Në fjalën e tij, kryeministri Rama u shpreh se Shqipëria ndodhet në një moment të mirë të shtimit të të ardhurave për shkak të turistëve në rritje, por megjithatë turizmi shqiptar përballet ende me disa sfida.
“Kjo është një rritje e kushtëzuar nga kufiri ende shumë i ngushtë i mundësive tona për t’iu përgjigjur kërkesës, sepse është shumë e lartë se sa oferta sot. Kjo përbën sfidën kryesore të rrisim ofertën për të përballuar një kërkesë që vjen gjithmonë e më në rritje.
Jemi në kushtet kur çdo vit marrim gjithmonë e më shumë shembuj që tregojnë se një boshllëk tjetër gjendet mes nesh dhe të ardhmes. Kemi parë gjithmonë turizmin të lidhur me sezonin veror dhe bregdetin, ndërkohë që kërkesa e fortë në rritje vjen dhe për pjesë të tjera të vendit. E vërteta është që potenciali i vendit, i ndodhur mes detit dhe malit, është i tillë që ne mund ta shtrijmë sezonin turistik në një sezon shumë më të gjerë se sa sezoni i verës”, u shpreh Rama.
Kryeministri prezantoi edhe disa nga masat mbështetëse të ndërmarra këtë vit për turizmin, siç është skema e agroturizmit, të cilën Rama e quajti një rrugëdalje të sigurt nga kthetrat e varfërisë për familjet në zonat rurale. Ndërkohë sipas kryeministrit, përgatitja për këtë sezon veror do të jetë në një nivel tjetër nga sezonet e kaluara.
“Qeveria po vazhdon të përgatitet si asnjëherë më parë për të garantuar një rritje të disa parametrave të sezonit turistik: pastërtinë, sigurinë dhe elementë të rinj që kanë të bëjnë me mundësitë për turistët për të pasur përtej orëve në plazh, edhe destinacione të ndryshme ku do të organizohen festa lokale të traditës, apo ku do të organizohen aktivitete të tjera të karakterit turistiko-kulturor”, u shpreh kryeministri.
Ndërkohë, Rama dhe ministrat vunë theksin edhe tek masat ndëshkuese që do të merren për subjektet që do të shkelin rregullat. Ministri i Turizmit dhe Mjedisit, Blendi Klosi, paralajmëroi pezullimin e licencave për subjektet që derdhin ujërat e zeza në bregdet apo lumenj, si dhe moslejimin e zhurmave të forta të klubeve të natës.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.