Sezoni veror – Bankat ofrojnë kushte tërheqëse për depozitat

Sezoni veror është një periudhë e vitit që zakonisht sjell rritje të depozitave bankare. Kjo lidhet me një përqendrim të të ardhurave nga turizmi dhe nga kthimi i emigrantëve në vend për pushime. Në këtë periudhë, bankat tentojnë të ofrojnë kushte më tërheqëse për depozitat bankare.

Credins Bank është një nga bankat me rritjen më të shpejtë të depozitave gjatë viteve të fundit. Mbështetur në treguesit financiarë të publikuara nga banka për tremujorin, në fund të marsit totali i depozitave të bankës ishte në rritje me afro 16% krahasuar me të njëjtën periudhë të një viti më parë. Edlira Heba, drejtore e departamentit të Thesarit, thotë se ecuria e depozitave këtë vit është mjaft pozitive, e nxitur edhe nga normat tërheqëse të interesit që ofron Credins Bank. Gjithashtu, Credins e mbështet ofertën e saj edhe te fleksibiliteti i produkteve, me depozitat ku klienti mund ta zgjedhë vetë maturitetin.

“Ecuria e depozitave në bankën CREDINS ka vijuar tendenca në rritje dhe  për vitin 2019. Kjo ecuri është mbështetur nga rritja e depozitave kryesisht në monedhën vendase dhe në euro. Po të krahasojmë të dhënat nga tani krahasuar me një vit më parë vihet re një rritje e depozitave me afat të individëve në lek në monedhën vendase. Kjo, për shkak edhe të normave konkurruese që banka CREDINS ka për depozitat sidomos me afat të gjatë maturimi. Sezoni turistik gjithmonë është shoqëruar me rritjen e depozitave dhe kjo sigurisht edhe nga prurjet e emigrantëve. Mendojmë që edhe këtë vit do të jetë e njëjta situatë. Mund të themi që strategjia që banka CREDINS ka ndjekur dhe do të ndjekë në këtë sezon është ofrimi i një game të gjerë produktesh për klientët e saj. Klientët e bankës CREDINS që duan  të investojnë fondet e tyre në bankën CREDINS mund të zgjedhin depozitat me afatet dhe me monedhën që dëshirojnë. Kryesisht normat e interesit për depozitat afatgjatë janë më të favorshme, normat e interesit të depozitave 5-vjecare shkojnë deri në 3.5%. Përveç depozitave më afat klasik 2,3,5 vjeçare, banka Credins ofron edhe depozitat kalendarike, pra klienti mund të zgjedhë vetë datën e maturimit të depozitës sipas nevojave të tij. Pra, Banka Credins i përshtatet gjithnjë e më shumë nevojave të klientëve të saj. Normat e interesit janë të favorshme” – tha Heba.

Zonja Heba thotë se gjatë këtij viti vërehet një rritje e kënaqshme e depozitave në lekë. Megjithatë, përgjithësisht euro vazhdon të ketë epërsi në strukturën e depozitave bankare. Sipas saj, kjo lidhet kryesisht me shkallën e lartë të euroizimit të ekonomisë reale në Shqipëri.

“Këto vitet e fundit në sistemit bankar është vërejtur një rritje e peshës së depozitave në euro. Kjo për faktin se prurjet e emigrantëve janë në  monedhën europiane. Shqiptarët zgjedhin që kursimet e tyre ti mbajnë në euro sepse monedhën që kanë është në euro. Klientët duan të bëjnë diversifikimin e monedhës së tyre, pra një pjesë ta mbajnë një euro një pjesë ta mbajnë në valutë tjetër, për shkak të blerjes së pronave të paluajtshme në monedhën euro apo arsimimit të fëmijëve të tyre në universitetet europiane apo dhe afërsia me marrëdhëniet tregtare. Megjithatë, nëse një klient përveç faktit se një klient, për vetë faktin se këto norma të depozitave në euro janë më të ulta se në lek mund të kthejnë depozitën nga euro në lek dhe banka Credins ofron kushte shumë të favorshme për këmbimin valutor” – tha Heba.

Sipas të dhënave nga Banka e Shqipërisë, në fund të prillit depozitat bankare kishin vlerën e 998 miliardë lekëve. Krahasuar me një vit më parë, totali i depozitave është zgjeruar me rreth 20 miliardë lekë. Raporti mes kredive dhe depozitave në sistemin bankar ngelet mjaft i ulët, me më pak se 55%. Ky është një nga treguesit që dëshmojnë se sistemi bankar është gjerësisht likuid dhe hapësirat për të rritur huadhënien janë të mëdha.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.