Sfida ’10 milion turistë’ – Klosi: Do ta arrijmë me mekanizma ligjorë, ndërhyrje administrative dhe promovim

Ministria e Turizmit dhe Mjedisit është e vendosur të ndërtojë një mekanizëm të ri në zbatim të politikave që mbrojnë mjedisin dhe për rrjedhojë promovojnë turizmin. Këtë e provojnë edhe rezultatet konkrete në terren, si mbyllja e guroreve të paligjshme, eliminimi i përdorimit të qeseve plastike të pariciklueshme apo vendimi që ndalon importimin e makinave me mbi 10 vite përdorim, si një nga industritë që ndot më shumë ajrin. Gjithashtu edhe numri i turistëve, i cili pati rritje të jashtëzakonshme këtë vit krahasuar me çdo vit tjetër.

“Sfida jonë është të realizojmë 10 milion turistë dhe për të arritur këtë kemi përgatitur një listë me problematika. Diskutuam sot me partnerët e ministrisë për të ndërtuar mekanizma të vërtetë, të cilët kontrollojnë zhvillimet turistike në këto zona dhe po ashtu afrojnë brenda eksperiencës që kanë Kombet e Bashkuara në shumë aspekte sesi mjedisi të mbrohet dhe turizmi të zhvillohet. Kemi arritur të listojmë problematikat që duke marrë mekanizma ligjorë, ndërhyrje administrative, por dhe duke e shtuar reklamimin e bukurive të natyrës shqiptare, ne padyshim do ja dalim që numri 10 milion turistë të arrihet jo vetëm në një kohë të shpejtë, por edhe me mekanizma që sigurojnë që ky turizëm të jetë i qëndrueshëm, të prodhojë ekonomi, punësim dhe që të ardhurat që fitohen nga turizmi të investohen për një Shqipëri të bukur dhe të mbrojtur edhe nga pikëpamja mjedisore” – tha ministri.

Ministria e Turizmit dhe e Mjedisit zbardhi një plan prej 365 masash për 365 ditët e vitit të ardhshëm turistik, ku evidentohen problematikat me qëllim përmirësimin e tyre në 2019-n.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.