Sfidat drejt BE – Jaka: Sipërmarrja në rrugën e duhur, politika pa axhendë konkrete
Rritja e eksporteve me 70% dhe importeve me 60% është tregues i rëndësishëm për sipërmarrjen shqiptare në një kohë që vendi ynë aderon për t’u bërë pjesë e BE. Kështu ka deklaruar kreu i Dhomës së Tregtisë dhe Industrisë, Nikolin Jaka, gjatë konferencës së katërt ndërkombëtare mbi “problemet dhe sfidat e transformimit të shoqërisë drejt standardeve të BE.
“Tashmë ne e kemi zgjedhur rrugën tonë. Rruga jonë është drejt Bashkimit Europian. Sot po bëjmë edhe krahasimin e shifrave të qarkullimit tregtar, kemi rreth 70% të eksporteve shqiptare në Bashkimin Europian dhe rreth 60% të importeve nga BE. Kjo është një risi jashtëzakonisht e rëndësishme, për të kuptuar që tashmë qytetarët dhe sipërmarrja shqiptare e ka gjetur rrugën e saj dhe rruga e saj është standardi e cilësia”, tha Jaka.
Teksa kërkoi bashkëpunim me universitetet në mënyrë që studentët të jenë të përgatitur për tregun e punës, Jaka dha dhe një mesazh të qartë për politikën Shqiptare, se vetëm duke përmirësuar standardet dhe cilësinë e jetës së qytetarëve mund të bëhen denjësisht pjesë e BE.
“Nëqoftëse ne pretendojmë të integrohemi në Bashkimin Europian duke mënjanuar standardin, duke mënjanuar cilësinë, duke mënjanuar dijen, duke mënjanuar edukimin, transferimin e dijeve, know how apo teknologjinë, nuk bëjmë asgjë tjetër veçse shkojmë të mishëruar nga Bashkimi Europian dhe kjo nuk u përket qytetarëve shqiptarë dhe jam i bindur se asnjë nga qytetarët e sipërmarrësit tanë nuk e do këtë. Këtë mund ta dojë më shumë klasa politike, e cila akoma nuk ka një axhendë konkrete se si duhet ta integrojë dhe se si duhet të përmirësojë jetesën dhe cilësinë e qytetarit shqiptar, në mënyrë që ne të jemi në nivelet e duhura”, shtoi Jaka.
Më herët rektorët e universiteteve pjesëmarrëse në aktivitet theksuan rëndësinë e gjetjeve përmes kërkimit shkencor dhe transferimin e dijeve si pikë orientuese për hartimin e politikave të zhvillimit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.