Sfidat e Auditimit në Shqipëri Qato: Raportimi financiar, përgjegjësi për integrimin në BE
Profesioni i Audituesit në Shqipëri bën 20 vjet dhe ndeshet në vazhdimësi me sfida në një ambient ekonomik në ndryshim të vazhdueshëm. IEKA ka zhvilluar konferencën e IV ndërkombëtare e cila synon të rrisë ndërgjegjësimin mbi rëndësinë e raportimit financiar.
Këtë konferencë e ka përshëndetur edhe Ministrja e Shtetit për Mbrojtjen e Sipërmarrjes Sonila Qato. Puna e audituesit po përballet me sfida të mëdha dhe përgjegjësi në një kohë kur vendi synon integrimin në BE sipas Qatos.
“Duke promovuar transparencën dhe nevojën për respektimin e barabartë të ligjit, profesioni i audituesit mund të ndihmojë shumë, veçanërisht për të garantuar suksesin e luftës ndaj informalitetit.
Sfidat e integrimit – Puna që duhet të bëjmë për t’u integruar në Bashkimin Europian, kërkon angazhimin e të gjithë faktorëve dhe padyshim profesioni juaj do të dijë të orientohet drejt duke kontribuar në këtë proces kaq të rëndësishëm.”
Presidenti i Institutit të Ekspertëve Kontabël të Autorizuar , Hysen Çela si dhe sekretari i Komisionit të Ekonomisë dhe Financave Anastas Angjeli u ndalën në rëndësinë që ka ky profesion sa i përket raportimeve të sakta financiare.
“Auditimi vijon të mbetet edhe sot në axhendë në shumë vende të botës. Pasi përfitimet që rrjedhin prej tij janë të dëshirueshme jo vetëm për bizneset, por edhe për një zhvillim ekonomik të qëndrueshëm. Në kushtet e reja rëndësi parësore merr rikonsiderimi i rolit, në mënyrë që profesioni i audituesit të jetë jo vetëm në pajtim me kërkesat e reja ligjore e rregullatore, por edhe me zhvillimet e vrullshme në teknologjinë e informacionit, të cilat kërkojnë një transformim drejt një profesioni të digjitalizuar.”
‘Ekspertiza juaj është tashëm një instrument i rëndësishëm në mbështetej të reformave rregullatore të institucioneve të tregut, të veprimtarisë së rregullt ligjore të bizneseve që zhvillojnë veprimtarinë e tyre në vendin tonë, të formalizimit të ekonomisë dhe arritjen e standardeve bashkëkohore europiane në këtë drejtim.”
Në konferencë u diskutua mbi rëndësinë e digjitalizimit dhe përdorimit të teknologjisë si dhe nevoja për diversifikimin e shërbimeve de shtimin e cilësisë. Një tjetër pik me interes ishte edhe përmirësimi i edukimit duke e vlerësuara si faktor kyç për suksesin e profesionit kontabël.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.