Sfidat që përballet Europa – Duhet një integrim më i fortë për t’i bërë ballë populizmit
Bashkimi Europian duhet të integrohet më tej dhe të ndërmarrë një qasje më të vendosur ndaj Shteteve të Bashkuara dhe Kinës në konfliktet e jashtme, për të nxitur suksesin e bizneseve, sipas Tryezës Rrumbullake Europiane të Industrialistëve (ERT).
Ndërkohë që kompanitë duhet të përqendrohen te aftësitë e punonjësve, dixhitalizimi dhe energjia e gjelbërt, është thelbësore që institucionet e Bashkimit Europian të krijojnë kushtet që inkurajojnë investimet, sipas grupit të lobimit që bashkon 55 ekzekutivë të bizneseve.
Ndër 6 fushat e sugjeruara për Bashkimin Europian, grupi theksoi se duhet të trajtohet më mirë unioni i energjisë, tregu i përbashkët dixhital dhe unioni i tregjeve të kapitalit, në mënyrë që të përfundojë fragmentizimi dhe të shtohet konkurrenca. Studimi theksoi se me rritjen e populizmit dhe daljen e Britanisë nga Bashkimi Europian, është e rëndësishme që kompanitë dhe institucionet të vërtetojnë se si tregu i lirë nxit prosperitetin dhe sfidat si ndryshimi klimatik dhe risitë teknologjike.
Kryetari i grupit të lobimit dhe ish presidenti i BP, Carl-Henric Svanberg, tha se kjo qasje po përballet me sfida të vërteta, nga brenda dhe jashtë Europës. Ai shtoi se duhet vërtetuar përsëri te qytetarët se si krijohet vlera.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.