SHBA, bie papunësia pranë nivelit më të ulët që prej vitit 2001
Papunësia në Shtetet e Bashkuara të Amerikës ka zbritur pranë nivelit më të ulët të 16 viteve të fundit gjatë Majit, në vetëm 4.3%.
Por, tregu i punës ka ngadalësuar ndjeshëm hapin e rritjes, ç`ka i bën të dhënat e fundit të jenë një lajm i keq për ekonominë amerikane. Punësimi gjatë muajit u rrit me vetëm 138 mijë persona, ose 66 mijë më pak se muaji Prill.
Ekspertët shprehen se, kjo nuk do të ketë ndikim në vendimin e Rezervës Federale të 13 dhe 14 Qershorit. Tregu i punës rezulton mjaftueshëm i fortë që Rezerva Federale të rrisë normat e interesit duke vijuar ciklin e normalizimit gradual të politikave monetare.
Ekonomia numër një në botë duhet të krijojë mes 75 mijë dhe 100 mijë vendeve të reja të punës në muaj, në mënyrë që të ruajë ritmet e rritjes në raport edhe me popullsinë.
Norma e papunësisë ra me 0.1 pikë përqindje, pranë nivelit më të ulët që prej majit të vitit 2001, për shkak se, 429 mijë persona dolën nga forca punëtore. Pagat në orë u rritën me vetëm 0.2% gjatë Majit, me një hap të ngjashëm me atë të Prillit.
Ngadalësimi i tregut të punës vjen edhe si pasojë e faktit se, ky treg i është afruar kapacitetit të plotë, dhe shumë shpejt nuk do të ketë më hapësira për zgjerim.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.