SHBA dështon të sigurojë Europën dhe Japoninë për “Trumponomics”
Shtetet e Bashkuara deklaruan të shtunën se ekonomitë e tjera botërore po mësoheshin me politikat e presidentit Donald Trump, por Europa dhe Japonia treguan se vazhdojnë të jenë të shqetësuara për ndryshimin në planet e Uashingtonit.
Zyrtarë nga vendet e G7 u takuan në Itali për të dëgjuar mbi planet e Trump, të cilët frikësonin këto vende se po ringjallin proteksionizmin.
Sekretari amerikan i Thesarit Steven Mnuchin tha se SHBA kanë të drejtën të jenë proteksioniste nëse mendojnë se tregtia nuk është e lirë ose e drejtë.
“Ne nuk duam të bëhemi proteksionistë, por i qëndrojmë të drejtës sonë për të qenë proteksionistë në masën kur nuk besoj se tregtia është e drejtë…Ne synojmë për më shumë balancë tregtare dhe njerëzit na kanë dëgjuar”, tha Mnuchin për gazetarët në fund të takimit dy ditor.
“Dhe tani që kanë patur mundësinë të kalojnë kohë me mua dhe të dëgjojnë presidentin e të kuptojnë mesazhin tonë ekonomik, njerëzit janë më të qetë”, vijoi Mnuchin.
Por ministrat e tjerë nga vendet e G7 e bënë të qartë se nuk e ndajnë këtë këndvështrim.
“Të gjashtë të tjerët, i thanë në mënyrë të qartë dhe të drejtpërdrejtë përfaqësuesve të administratës së SHBA se është absolutisht shumë e nevojshme të vazhdohet me të njëjtën frymë bashkëpunimi ndërkombëtar”, tha ministri francez i Financave Michel Sapin.
Guvernatori i Bankës së Francës, Villeroy de Galhau tha se kishte një fllad të lehtë optimizmi brenda G7 pas fillimit të rimëkëmbjes të ekonomisë globale. Por sipas tij një rrezik u riparaqit pas paqartësive të politikave të SHBA. Këtë mendim e ndan edhe ministri japonez i financave, Taro Aso.
“Nuk duhet të bëjmë hapa pas në tregtinë e lirë sepse ka kontribuar në lulëzimin ekonomik”, tha Aso.
Zyrtarët europianë ankohen se askush nuk e di se çfarë Amerika nënkupton me “tregti e drejtë” dhe thonë se e vetmja mënyrë për të caktuar drejtësinë është duke iu përmbajtur rregullave të Organizatër Botërore të Tregtisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.